ഇറ്റാനഗര്‍: നോട്ട് അസാധുവാക്കികൊണ്ടുള്ള പ്രഖ്യാപനം വന്ന ശേഷം അരുണാചല്‍ പ്രദേശിലെ വിവിധ ബ്രാഞ്ചുകളിലായി 1,300 കോടി രൂപയുടെ നിക്ഷേപം വന്നതായ റിപ്പോര്‍ട്ട് എസ്.ബി.ഐ നിഷേധിച്ചു. ഇത്തരത്തില്‍ ഒരു നിക്ഷേപവും സംസ്ഥാനത്തെ ഒരു ശാഖകളിലും വന്നിട്ടില്ലെന്ന് എസ്.ബി.ഐ റീജിയനല്‍ മാനേജര്‍ സകിയ സിന്‍ഹ ബൈരാഗി അറിയിച്ചു.
ബാങ്കിന്റെ എല്ലാ രേഖകളും തങ്ങള്‍ പരിശോധിച്ചിട്ടുണ്ട്. ഇതിലൊന്നും അനധികൃത നിക്ഷേപം വന്നിട്ടില്ലെന്നും അദ്ദേഹം വ്യക്തമാക്കി. അരുണാചല്‍ മേഖലയിലെ 26 ശാഖകളിലായി നവംബര്‍ എട്ടിന് 1,595 കോടി രൂപയാണ് നിക്ഷേപമായുണ്ടായിരുന്നത്. ഈ മാസം 24 ആയപ്പോള്‍ മൊത്തം 1748 കോടി രൂപയാണ് നിക്ഷേപമുണ്ടായത്. അതായത് 153 കോടി രൂപയുടെ വര്‍ധനവ് മാത്രമാണ് ഉണ്ടായതെന്ന് റീജിയനല്‍ മാനേജര്‍ അറിയിച്ചു.