എടപ്പാള്‍: ഭാരതപ്പുഴയില്‍ കുറ്റിപ്പുറത്തു ജലവിഭവ വകുപ്പ് കെട്ടുന്ന താല്‍ക്കാലിക തടയണ നിര്‍മാണത്തില്‍ അഴിമതിയുണ്ടെന്ന ആരോപണവുമായി നിള സംരക്ഷണസമിതി രംഗത്ത്. 9.2 ലക്ഷം രൂപ ചെലവഴിച്ചാണ് പദ്ധതി നടപ്പിലാക്കുന്നതെന്നാണ് ജലവിഭവ വകുപ്പ് പറയുന്നത്.
പുഴയിലെ മണല്‍ ചാക്കുകളില്‍ നിറച്ച് 100 മീറ്ററിനുള്ളില്‍ നീളത്തില്‍ നിര്‍മിക്കുന്ന തടയണയ്ക്ക് എങ്ങനെയാണ് ഇത്രയും തുക ചെലവുവരികയെന്നാണ് നിള സംരക്ഷണസമിതി ചോദിക്കുന്നത്.നിര്‍മാണത്തിലെ അഴിമതി പുറത്തുകൊണ്ടണ്ടുവരണമെന്നാവശ്യപ്പെട്ടു തവനൂരിലെ നിള സംരക്ഷണസമിതി പ്രതിഷേധവുമായി പദ്ധതിപ്രദേശം കഴിഞ്ഞ ദിവസം സന്ദര്‍ശിച്ചു. 100 മീറ്റര്‍ നീളത്തില്‍ എസ്റ്റിമേറ്റ് നല്‍കിയ തടയണ നിലവില്‍ 68 മീറ്റര്‍ മാത്രമാണ് നിര്‍മിച്ചിട്ടുള്ളത്.
നൂല്‍ച്ചാക്കുകളില്‍ മണല്‍ നിറച്ച് അട്ടിയിട്ടാണു നിര്‍മാണം. ചാക്കുകളുടെ വിലയും കൂലിയും മാത്രമാണ് ആകെയുള്ള ചെലവ്. മണ്ണ് അടക്കമുള്ള അസംസ്‌കൃത വസ്തുക്കള്‍ ഉപയോഗിക്കാതെ നിര്‍മിക്കുന്ന ബണ്ടണ്ടിന് ഇത്രയും തുക എന്തിനാണെന്നും നിള സംരക്ഷണസമിതി പ്രവര്‍ത്തകര്‍ ചോദിക്കുന്നു. ചാക്കുകളില്‍ നിറയ്ക്കാനുള്ള മണല്‍പോലും പുഴയില്‍നിന്നു സൗജന്യമായി എടുക്കുന്നതാണ്. കഴിഞ്ഞ വര്‍ഷംവരെ നാലു ലക്ഷത്തോളം രൂപയാണു ബണ്ട് നിര്‍മാണത്തിനായി ചെലവിട്ടിരുന്നത്.
ഈ വര്‍ഷം പ്ലാസ്റ്റിക് ചാക്കിനു പകരം നൂല്‍ച്ചാക്കുകളാണ് ഉപയോഗിച്ചതെന്നും ഇതാണ് നിര്‍മാണച്ചെലവ് വര്‍ധിക്കാന്‍ ഇടയാക്കിയതെന്നും ജലവകുപ്പ് ഉദ്യോഗസ്ഥര്‍ പറയുന്നു. അഞ്ചു പഞ്ചായത്തുകളിലേക്ക് ശുദ്ധജലം എത്തിക്കുന്ന ഡാനിഡ പദ്ധതിയിലെ ശുദ്ധജല കിണറിലേക്കു വെള്ളം സംഭരിക്കാനാണ് വേനല്‍ക്കാലത്തു വര്‍ഷംതോറും പുഴയില്‍ താല്‍ക്കാലിക തടയണ നിര്‍മിക്കുന്നത്. നിള സംരക്ഷണസമിതി പ്രവര്‍ത്തകരായ കെ. മുരളീധരന്‍, എം. നളിനി, സിദ്ധാര്‍ഥന്‍, ദിലീപ്, ഗംഗാധരന്‍ എന്നിവരുടെ നേതൃത്വത്തിലാണ് പ്രതിഷേധം സംഘടിപ്പിച്ചത്.