ചക്കരക്കല്‍: മുണ്ടേരിയില്‍ നിന്നു അഞ്ച് വടിവാളുകള്‍ പൊലിസ് പിടിച്ചെടുത്തു.മുണ്ടേരി പക്ഷി സങ്കേതത്തിന്റെ കവാടത്തിനു സമീപമുള്ള വിജനമായ സ്ഥലത്തു നിന്നാണ് വടിവാളുകള്‍ കണ്ടെടുത്തത്. ഇന്നലെ രാവിലെ പത്തരയ്ക്ക് ചക്കരക്കല്‍ എസ്.ഐ ബിജുവിന്റെ നേതൃത്വത്തിലാണ് പരിശോധന നടത്തിയത്. ഇവിടെ ആയുധങ്ങള്‍ സംഭരിക്കുന്നതായും ഒരു സംഘമാളുകള്‍ കേന്ദ്രീകരിക്കുന്നതായും പൊലിസിനു രഹസ്യവിവരം ലഭിച്ചിരുന്നു. ഇതിന്റെ അടിസ്ഥാനത്തിലാണ് പരിശോധന നടത്തിയത്. വാള്‍ കാലപ്പഴക്കം കാരണം ചില ഭാഗങ്ങള്‍ തുരുമ്പെടുത്തിട്ടുണ്ട്. പ്രദേശത്ത് കൂടുതല്‍ സ്ഥലങ്ങളില്‍ പിന്നീട് തെരച്ചില്‍ നടത്തിയെങ്കിലും ഒന്നും കണ്ടെത്താനായില്ല. പ്രതികളെ ഉടന്‍ പിടികൂടുമെന്നും എസ്.ഐ ബിജു പറഞ്ഞു. ബോംബ് സ്‌ക്വാഡും ഡോഗ് സ്‌ക്വാഡും പരിശോധനയില്‍ പങ്കെടുത്തു.