തിരുവനന്തപുരം: നാളെ അധികാരമേല്‍ക്കുന്നത് കേരളത്തിന്റെ സ്വന്തം സര്‍ക്കാരാണെന്ന് നിയുക്ത മുഖ്യമന്ത്രി പിണറായി വിജയന്‍. എല്‍.ഡി.എഫ് സര്‍ക്കാരിന് ജാതി മത കക്ഷി രാഷ്ടീയ വ്യത്യാസമുണ്ടാവില്ല. മുഴുവന്‍ ജനങ്ങളുടേയും സര്‍ക്കാരായി പ്രവര്‍ത്തിക്കും. തിരിച്ചും അതേ മനോഭാവം പ്രതീക്ഷിക്കുന്നുവെന്നും അദ്ദേഹം പറഞ്ഞു.

നാടിന്റെ നന്മയ്ക്കായി ഒത്തുചേര്‍ന്നുള്ള പ്രവര്‍ത്തനമാണ് ലക്ഷ്യം. സര്‍ക്കാരിന്റെ നയങ്ങളെക്കുറിച്ച് നാളെ വിശദമായി പ്രഖ്യാപിക്കും. നാളെ സത്യപ്രതിജ്ഞയ്ക്ക് മുന്‍പ് മന്ത്രിമാരുടെ വകുപ്പുകളും പ്രഖ്യാപിക്കും. അഴിമതിക്കെതിരെ ജാഗ്രത പുലര്‍ത്തുന്നവരായിരിക്കും മന്ത്രിസഭയിലെ അംഗങ്ങളെന്നും പിണറായി പറഞ്ഞു.

നാളെ വൈകീട്ട് സെന്‍ട്രല്‍ സ്റ്റേഡിയത്തിലാണ് സത്യപ്രതിജ്ഞ. ചടങ്ങിലേക്ക് പൊതുസമൂഹത്തിന്റെ സാന്നിധ്യം പ്രതീക്ഷിക്കുന്നുവെന്നും  ചടങ്ങില്‍ സി.പി.എം ജനറല്‍ സെക്രട്ടറി സീതാറാം യെച്ചൂരി, പൊളിറ്റ് ബ്യൂറോ അംഗം പ്രകാശ് കാരാട്ട് എന്നിവര്‍ പങ്കെടുക്കുമെന്നും അദ്ദേഹം പറഞ്ഞു.

ചില അവതാരങ്ങളെ സൂക്ഷിക്കണം. തന്റെ സ്വന്തക്കാരാണെന്നു പറഞ്ഞു ചിലര്‍ വരാം അവര്‍ക്ക് തന്റെ രീതികള്‍ അറിയില്ലായിരിക്കാം. ഇത്തരക്കാരെ കുറിച്ച് വിവരം ലഭിച്ചാല്‍ തന്നെ അറിയിക്കണമെന്നും പിണറായി അറിയിച്ചു.