കൊട്ടാരക്കര: പുതുവത്സരാഘോഷം അപകട രഹിതമാക്കാന്‍ റൂറല്‍ പൊലിസ് ജില്ലയില്‍ ജാഗ്രതാ നടപടികള്‍ക്ക് തുടക്കമായി. ക്രിസ്മസ് ആഘോഷ വേളയില്‍ ആരംഭിച്ച നിരീക്ഷണങ്ങളും നടപടികളും ജനുവരി 5 വരെ തുടങ്ങും. ഈ കാലയളവില്‍ ഏറ്റവും കുറച്ച് വാഹനാപകടങ്ങളും കുറ്റകൃത്യങ്ങളും റിപ്പോര്‍ട്ട് ചെയ്യുന്ന കൊട്ടാരക്കര സബ് ഡിവിഷനിലെ പൊലിസ് സ്റ്റേഷന് പ്രത്യേക പുരസ്‌കാരം സമ്മാനിക്കുമെന്ന് കൊട്ടാരക്കര ഡി.വൈ.എസ്.പി കൃഷ്ണകുമാര്‍ അറിയിച്ചു.
രാത്രിയും പകലുമുള്ള വാഹന പരിശോധന കര്‍ക്കശമാക്കിയിട്ടുണ്ട്. മദ്യപിച്ച് വാഹനം ഓടിക്കുന്നവരുടെ ലൈസന്‍സ് റദ്ദ് ചെയ്യുന്നതിനുള്ള നടപടികള്‍ ഉണ്ടാകും. അമിത വേഗതയില്‍ വാഹനം ഓടിക്കുന്നവര്‍ക്കും ഇതേ നടപടികളാകും ഉണ്ടാവുക. പൊതു സ്ഥലങ്ങളിലും കടകളിലും മറ്റുമുള്ള മദ്യപാനം കര്‍ശനമായി തടയും. ഇത് ലംഘിക്കുന്നവര്‍ക്കെതിരേ ജാമ്യമില്ലാ വകുപ്പ് പ്രകാരം കേസ് എടുക്കും. വ്യാജ മദ്യവും ലഹരി വസ്തുക്കളും തടയാന്‍ കര്‍ശന നടപടികള്‍ ആരംഭിച്ചു കഴിഞ്ഞു. മുന്‍കാലങ്ങളില്‍ ഈ രംഗത്തുണ്ടായിരുന്നവര്‍ എല്ലാം നിരീക്ഷണത്തിലാണ്.
ജയില്‍ ശിക്ഷ കഴിഞ്ഞിറങ്ങിയ സ്ഥിരം കുറ്റവാളികളും പൊലിസ് നിരീക്ഷണത്തിലാണ്. വാഹനപെട്രോളിങ്, ബൈക്ക് പെട്രോളിങ് ശക്തമാക്കിയിട്ടുണ്ട്. പൊതു സ്ഥലങ്ങളും ടൗണുകളുമെല്ലാം ഷാഡോ പോലിസിന്റെ നീരീക്ഷണ വലയത്തിലാണ്. പുതുവത്സര ആഘോഷത്തിന് മുന്നോടിയായി ബിയര്‍ പാര്‍ലറുകളും സര്‍ക്കാരിന്റെ വിദേശ മദ്യശാലകളും നിശ്ചിതസമയത്തിനു മുന്നേ അടയ്ക്കുന്നതിനുള്ള ശ്രമങ്ങളും ആരംഭിച്ചിട്ടുണ്ട്.
ജില്ലാ പൊലിസ് മേധാവിയും ജില്ലാ കലക്ടറുമായി ആലോചിച്ചായിരിക്കും ഈ നടപടി. ആഘോഷങ്ങള്‍ സംഘടിപ്പിക്കുന്ന സംഘടനകള്‍ക്കും ഹോട്ടലുകള്‍ക്കുമെല്ലാം പോലിസ് കര്‍ശന നിര്‍ദേശം നല്‍കി കഴിഞ്ഞു.
ഇവിടെയെല്ലാം നിരീക്ഷണങ്ങള്‍ ഉണ്ടാകും. പൊലിസ് നിരീക്ഷണം ശക്തമായതോടെ മുന്‍ വര്‍ഷങ്ങളെ അപേക്ഷിച്ച് ഇത്തവണ വാഹനാപകടങ്ങളും മരണങ്ങളും കുറ്റകൃത്യങ്ങളും കുറഞ്ഞിട്ടുള്ളതായി ഡി.വൈ.എസ്.പി വ്യക്തമാക്കി.