കൊല്ലം: ജനങ്ങളുടെ ആവശ്യങ്ങള്‍ക്കും പരാതികള്‍ക്കും മുന്നില്‍ മുഖംതിരിക്കുന്ന പിണറായി സ്വന്തംപാര്‍ട്ടിയില്‍ നിന്നും ഉയര്‍ന്നുവരുന്ന പ്രശ്‌നങ്ങളില്‍ പതറുകയാണെന്നു പ്രതിപക്ഷനേതാവ് രമേശ് ചെന്നിത്തല. കേരളാ സ്റ്റേറ്റ് ഖാദി ബോര്‍ഡ് എംപ്ലോയീസ് യൂണിയന്റെ 54-ാം സംസ്ഥാന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. സെക്രട്ടറിയേറ്റില്‍ നൂറുകണക്കിന് ഫയലുകള്‍ കെട്ടികിടക്കുന്നു. സര്‍ക്കാര്‍ ജീവനക്കാരുടെയും വകുപ്പ് തലവന്‍മാരുടെയും യോഗം വിളിക്കേണ്ടതിന് പകരം പെഴ്‌സണല്‍ സ്റ്റാഫിന്റെ യോഗം വിളിക്കേണ്ട സ്ഥിതിയില്‍ സി.പി.എമ്മിലെ കടുത്ത വിഭാഗീയത കൊണ്ടെത്തിച്ചിരിക്കയാണെന്നും ഇത് ചരിത്രത്തില്‍ ആദ്യമാണെന്നും ചെന്നിത്തല പറഞ്ഞു.
രാജ്യസ്‌നേഹത്തിന്റെ മാതൃകയും ആശയങ്ങളും ആദര്‍ശങ്ങളും ഉയര്‍ത്തിപ്പിടിക്കേണ്ടതുമായ ഖാദി മേഖല കനത്ത വെല്ലുവിളി നേരിടുന്നു സാഹചര്യമാണ് നിലവിലുള്ളത്. സമൂഹം പ്രോത്സാഹിപ്പിക്കേണ്ട മേഖലയെ സംരക്ഷിക്കാനും തൊഴിലാളികളുടെ ക്ഷേമം ഉറപ്പുവരുത്താനും സര്‍ക്കാര്‍ തയറാവുന്നില്ല. ബാര്‍ട്ടര്‍ സമ്പ്രദായം നിലവിലുള്ള ഖാദി മേഖലയില്‍ റിബേറ്റു നിര്‍ത്തലാക്കാനാണ് ഇടതുപക്ഷ നീക്കം. ഇത് അംഗീകരിക്കനാകില്ലെന്ന് ചെന്നിത്തല പറഞ്ഞു.
യൂനിയന്‍ സംസ്ഥാന പ്രസിഡന്റ് മുന്‍ എം.എല്‍.എ വര്‍ക്കല കഹാര്‍ അധ്യക്ഷനായി. കെ.പി.സി.സി മുന്‍ പ്രസിഡന്റ് തെന്നല ബാലകൃഷ്ണപിള്ള, കെ.പി.സി.സി ജനറല്‍ സെക്രട്ടറി ശൂരനാട് രാജശേഖരന്‍, കെ.സി രാജന്‍, ചവറ ജയകുമാര്‍, രാമാനുജം, എ.എസ് നോള്‍ഡ്, കെ.വി ഗിരീഷ്‌കുമാര്‍, പി.എം കുര്യന്‍ സംസാരിച്ചു.