ആലപ്പുഴ: വര്‍ഗ്ഗീയ ശക്തികളെ പുറത്ത് നിര്‍ത്താനുളള ഉത്തരവാദിത്വമാണ് കോണ്‍ഗ്രസിന് നിര്‍വ്വഹിക്കാനുളളതെന്ന് കെ. സി വേണുഗോപാല്‍ എം.പി പറഞ്ഞു. ജില്ലാ കോണ്‍ഗ്രസ് കമ്മറ്റി സംഘടിപ്പിച്ച കോണ്‍ഗ്രസ് ജന്മദിനാഘോഷം ഉദ്ഘാടനം ചെയ്യുകയായിരുന്നു അദ്ദേഹം.
ദേശസ്‌നേഹം എന്നത് ബി.ജെ.പിയുടേയും സംഘപരിവാറിന്റേയും കുത്തകയല്ല. അതിനെക്കുറിച്ച് പറയാന്‍ അവകാശമുളള ഏകപാര്‍ട്ടി കോണ്‍ഗ്രസാണ്. സമൂഹത്തെ മുഴുവന്‍ വര്‍ഗ്ഗീയവത്ക്കരിക്കുകയെന്ന ലക്ഷ്യത്തിനപ്പുറം ബി. ജെ. പി സര്‍ക്കാരിന് ഒരുതരത്തിലുളള ലക്ഷ്യവുമില്ല. കള്ളപ്പണക്കാരെ പിടികുടും, തീവ്രവാദികളെ അമര്‍ച്ച ചെയ്യും എന്നീ രണ്ട് കാര്യങ്ങള്‍ പറഞ്ഞാണ് നരേന്ദ്രമോദി നോട്ടുകള്‍ അസാധുവാക്കിയത്. ഏത് കള്ളപ്പണക്കാരനെയാണ് സര്‍ക്കാര്‍ പിടികൂടിയത്? നോട്ട് നിരോധനത്തിന് ശേഷവും തീവ്രവാദി ആക്രമണം നടന്നു. ഈ തീവ്രവാദികളില്‍ നിന്നും ലഭിച്ചത് പുതിയ രണ്ടായിരത്തിന്റെ നോട്ടുകള്‍. സര്‍ക്കാരിന്റെ രണ്ട് പ്രഖ്യാപനവും ലക്ഷ്യം കണ്ടില്ല. സാധരണക്കാരന്‍ മാത്രം ഇപ്പോഴും ബാങ്കിലെ ക്യൂവില്‍ നില്‍ക്കുകയാണ്.
നരേന്ദ്രമോദി സര്‍ക്കാര്‍ ഇന്ത്യന്‍ കറന്‍സിയുടെയും ബാങ്ക് അക്കൗണ്ടുകളുടെയും വിശ്വാസ്യത നഷ്ടപ്പെടുത്തി. ജനജീവിതം ദുസഹമാക്കിയ സര്‍ക്കാരാണ് കേരളത്തിലുള്ളത്. കേരളത്തില്‍ ഭരണം നടക്കുന്നുണ്ടോയെന്ന് തന്നെ ജനങ്ങള്‍ സംശയിച്ചു തുടങ്ങിയിട്ടുണ്ട്. റേഷന്‍ വിതരണമുള്‍പ്പെടുള്ളവ ഈ സര്‍ക്കാര്‍ നശിപ്പിച്ചെന്നും അദ്ദേഹം കൂട്ടിച്ചേര്‍ത്തു. കാരുണ്യപദ്ധതിയില്ല, ചികിത്സയില്ല. കേന്ദ്ര-സംസ്ഥാന സര്‍ക്കാരുകളുടെ ജനവിരുദ്ധ നയങ്ങള്‍ക്കെതിരെ കോണ്‍ഗ്രസ് ഒറ്റക്കെട്ടായി പോരാടണം. ദുരിതമനുഭവിക്കുന്നവരുടെ കണ്ണീരൊപ്പി മുന്നോട്ട് പോകണമെന്നും കെ.സി പറഞ്ഞു.
ഡി.സി.സി പ്രസിഡന്റ് അഡ്വ. എം.ലിജു അധ്യക്ഷത വഹിച്ചു. നേതാക്കളായ അഡ്വ. സി.ആര്‍ ജയപ്രകാശ്, അബ്ദുള്‍ ഗഫൂര്‍ ഹാജി, കെ പി ശ്രീകുമാര്‍, എ.എ ഷുക്കൂര്‍, അഡ്വ. ഡി.സുഗതന്‍, പി.നാരായണന്‍കുട്ടി, എസ്.ശരത്, നെടുമുടി ഹരികുമാര്‍, എ കെ രാജന്‍, ജി മുകുന്ദന്‍പിളള, സി കെ ഷാജിമോഹന്‍, ശാന്തകുമാരി, കെ വി മേഘനാഥന്‍, കെ ആര്‍ മുരളീധരന്‍, യു മുഹമ്മദ്, സഞ്ജീവ് ഭട്ട്, പി ഉണ്ണിക്കൃഷ്ണന്‍, എന്‍ രവി, സുനില്‍ജോര്‍ജ്ജ്, റിഗോ രാജു, പ്രതാപന്‍ പറവേലി, വി കെ ബൈജു, പ്രമോദ് ചന്ദ്രന്‍, ശങ്കര്‍, ആര്‍ ബി നിജോ, എസ് കൃഷ്ണകുമാര്‍, എം ബി സജി, രവിപുരത്ത് രവീന്ദ്രന്‍, എസ് ദീപു, സുജാ ജോഷ്വ, ലളിതാ രവിന്ദ്രനാഥ് തുടങ്ങിയവര്‍ പ്രസംഗിച്ചു. ഡി സി സി ട്രഷറര്‍ ടി സുബ്രഹ്മണ്യദാസ് സ്വാഗതം പറഞ്ഞു.