കോഴിക്കോട്: സ്‌കൂള്‍ കലോത്സവങ്ങളില്‍ വിവിധ കലാമത്സരങ്ങളുടെ വിധികര്‍ത്താക്കളെ നിയമിക്കുന്നതില്‍ സ്വജനപക്ഷപാതവും അനീതിയും നടക്കുന്നുവെന്ന ആക്ഷേപം വീണ്ടുമുയരുന്നു. സംസ്ഥാന കലോത്സവം കണ്ണൂരില്‍ ജനുവരിയില്‍ നടക്കാനിരിക്കെയാണ് കലോത്സവ ജഡ്ജ്‌മെന്റ് നിയമനത്തിനെതിരേ ഗുരുതര ആരോപണങ്ങള്‍ ഉന്നയിച്ച് ചില കലാകാരന്‍മാര്‍ രംഗത്തെത്തിയിരിക്കുന്നത്.
പ്രധാനമായും മാപ്പിളകലകളായി അറിയപ്പെടുന്ന ദഫ്, ഒപ്പന, വട്ടപ്പാട്ട്, അറബന, മാപ്പിളപ്പാട്ട് തുടങ്ങിയ മത്സരങ്ങള്‍ ജഡ്ജ് ചെയ്യാനെത്തുന്നവര്‍ക്ക് ആ കലകളുമായി ബന്ധപ്പെട്ട പ്രാഥമികവിവരം പോലും ഇല്ലാത്തവരാണെന്നാണ് കോഴിക്കോട് പ്രസ്‌ക്ലബില്‍ വാര്‍ത്താസമ്മേളനത്തില്‍ അഖിലകേരള കോല്‍ക്കളി സംഘം ഏകോപന സമിതി ചെയര്‍മാന്‍ നാസര്‍ കാപ്പാട് അടക്കമുള്ള കലാകാരന്‍മാര്‍ പറയുന്നത്.
പല കലാമേളകളിലും വിധികര്‍ത്താക്കളായെത്തുന്നത് കേവലം പതിനഞ്ച് ദിവസം മാത്രമുള്ള ഒരു കോഴ്‌സ് കഴിഞ്ഞവരാണ്. മിക്ക മേളകളിലും ഇവരെ ചില അധ്യാപക സംഘടനകള്‍ ക്വട്ടേഷന്‍ സംവിധാനം പോലെ എടുക്കുകയാണ്. പത്രത്തിലൂടെ ജഡ്ജിങ് പാനലിലേക്ക് പരസ്യം നല്‍കുന്നുണ്ടെങ്കിലും അങ്ങിനെ ലഭിക്കുന്ന അപേക്ഷകളില്‍ അഭിമുഖം നടത്താറില്ല. കോഴിക്കോട് ജില്ലയില്‍ നടക്കാന്‍ പോകുന്ന റവന്യൂ ജില്ലാകലോത്സവത്തിന് ജഡ്ജസായി വരുന്നവര്‍ നേരത്തെ സി.ബി.എസ്.ഇ കലോത്സവത്തില്‍ വിലക്ക് നേരിട്ടവരാണെന്നും ആരോപണമുണ്ട്.
കോല്‍ക്കളി മാപ്പിളകലയില്‍ ഉള്‍പ്പെടുത്തിയതിനാല്‍ മാപ്പിള കോല്‍ക്കളി മാത്രമേ മത്സരമായി അവതരിപ്പിക്കാന്‍ പറ്റൂവെന്ന അവസ്ഥയാണ്. മറ്റ് സമുദായങ്ങളുടെ കോല്‍ക്കളിയെയും മത്സരത്തില്‍ അവതരിപ്പിക്കാനുള്ള സാഹചര്യമൊരുക്കണമെന്ന് വാര്‍ത്താ സമ്മേളനത്തില്‍ പങ്കെടുത്ത കോല്‍ക്കളി ആശാന്‍ ആര്‍.എന്‍ പീറ്റക്കണ്ടി ആവശ്യപ്പെട്ടു. വാര്‍ത്താസമ്മേളനത്തില്‍ മഹേഷ് ചെമ്മരത്തൂര്‍, ബഷീര്‍ കല്ലായി എന്നിവരും പങ്കെടുത്തു.