നാദാപുരം: തരിശുഭൂമിയില്‍ വിത്തിറക്കി നൂറുമേനിയുമായി യുവാക്കള്‍ മാതൃകയായി. നാദാപുരം പഞ്ചായത്തിലെ 17ാം വാര്‍ഡില്‍ കാലങ്ങളായി തരിശായിക്കിടക്കുന്ന വാണിയൂര്‍ത്താഴ വയലിലെ ഒന്നേകാല്‍ ഏക്കര്‍ ഭൂമിയിലാണ് നെല്‍കൃഷി നടത്തിയത്.
വര്‍ഷങ്ങളായി കൃഷി നടത്താതെ ഒഴിഞ്ഞു കിടക്കുകയായിരുന്ന സ്വകാര്യ വ്യക്തിയുടെ സ്ഥലത്ത് പ്രദേശവാസികളായ റിയാസ്, പ്രവീണ്‍, അശോകന്‍, മഹീന്ദ്രന്‍ എന്നിവരടങ്ങുന്ന എട്ടു പേരുടെ നേതൃത്വത്തിലാണ് കൃഷിയിറക്കിയത്. രണ്ടര മാസം മുന്‍പ് വിത്തിറക്കിയ ഇവിടെ തുലാവര്‍ഷത്തിലെ മഴ ലഭ്യതക്കുറവ് കാരണം അകലെയുള്ള ജലസംഭരണിയില്‍ മോട്ടോര്‍ സ്ഥാപിച്ച് കൃഷിക്കാവശ്യമായ വെള്ളം എത്തിക്കുകയായിരുന്നു. ജനുവരി രണ്ടാം വാരത്തില്‍ കൊയ്ത്തു നടത്താനാണ് നിശ്ചയിച്ചിരിക്കുന്നത്.