വടകര: നാരായണനഗറിലെ ശ്രീമണി ബിയര്‍പാര്‍ലറിന്റെ വരാന്തയില്‍ ബുധനാഴ്ച രാത്രിയുണ്ടായ അക്രമത്തില്‍ രണ്ടുപേര്‍ക്ക് കുത്തേറ്റു. മേപ്പയില്‍ കുളങ്ങരത്ത് ജംഷിന്‍(28), കടമേരി കളരിയുള്ളതില്‍ രമേശ്(32) എന്നിവര്‍ക്കാണ് പരുക്കേറ്റത്. ഇവരെ ഗുരുതരാവസ്ഥയില്‍ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
സുഹൃത്തുക്കളായ ഇവര്‍ ബാറില്‍ നിന്നു ബിയര്‍ വാങ്ങി പുറത്ത് നിന്നു മദ്യപിക്കുമ്പോള്‍ ഒരു സംഘം ആക്രമിക്കുകയായിരുന്നുവെന്നാണ് പറയുന്നത്. ഇരുവരേയും കത്തികൊണ്ട് കുത്തുകയായിരുന്നു. കാരണം വ്യക്തമല്ല. കുത്തിപരിക്കേല്‍പിച്ച ശേഷം അക്രമികള്‍ കടന്നുകളഞ്ഞു. ഇവരെ കുറിച്ച് പൊലിസിനു വിവരം ലഭിച്ചിട്ടുണ്ട്. ബാറിലെ സി.സി.ടി.വി ദൃശ്യം പൊലിസ് ശേഖരിച്ചു. സംഭവം സംബന്ധിച്ച് അന്വേഷിച്ചുവരുന്നതായി പൊലിസ് അറിയിച്ചു.