തിരൂര്‍:വഖഫ് ബോര്‍ഡ് തെരഞ്ഞെടുപ്പില്‍ വലിയപറപ്പൂര്‍ മഹല്ല് ഭരണം സമസ്ത പാനലിനു വിജയം. 33 അംഗ സമിതിയിലേക്ക് നടന്ന തെരെഞ്ഞടുപ്പില്‍ 336 വോട്ടിന്റെ ഭൂരിപക്ഷത്തിനാണ് സമസ്ത പാനല്‍ തെരഞ്ഞെടുക്കപ്പെട്ടത്. വോട്ട് ചെയ്ത 1050 പേരില്‍ 689 പേരും സമസ്തയെ പിന്തുണച്ചു. വര്‍ഷങ്ങളായി കാന്തപുരം വിഭാഗത്തിനു കീഴിലായിരുന്നു മഹല്ല് ഭരണസമിതി.
മുഈനുല്‍ മില്ലാ സംഘത്തിലേക്കാണ് തെരഞ്ഞെടുപ്പ് നടന്നത്. തെരഞ്ഞെടുപ്പില്‍ കാന്തപുരം വിഭാഗത്തിനു 353 വോട്ട് ലഭിച്ചു. 8 വോട്ട്് അസാധുവായി. രണ്ടു ബൂത്തുകളിലായി രാവിലെ 8ന് ആരംഭിച്ച തെരഞ്ഞെടുപ്പ് നാലു മണിക്കാണ് അവസാനിച്ചത്. വരണാധികാരി അഡ്വ. കാരാട്ട് അബ്ദുറഹ്മാന്‍, അസി.വരണാധികാരി അഡ്വ.നാസര്‍ പരിപ്പില്‍ എന്നിവരുടെ നേതൃത്വത്തിലായിരുന്നു വോട്ടെടുപ്പ്.
18 വയസ്സ് പൂര്‍ത്തിയായ 1800ഓളം പുരുഷന്‍മാര്‍ക്കായിരുന്നു വോട്ടവകാശം. തെരഞ്ഞെടുപ്പ് സ്റ്റേ ചെയ്യണമെന്ന് ആവശ്യപ്പെട്ട കാന്തപുരം സുന്നീ വിഭാഗം വഖഫ് ട്രിബൂണലിലും ഹൈക്കോടതിയിലും നല്‍കിയ കേസ് തള്ളിയാണ് തെരഞ്ഞെടുപ്പിനു ഉത്തരവിട്ടത്. ഫലപ്രഖ്യാപനത്തിനു ശേഷം വരണാധികാരി അഡ്വ. അബ്ദുറഹ്മാന്‍ കാരാട്ടിന്റെ അധ്യക്ഷതയില്‍ നടന്ന പ്രഥമ ഭരണസമിതിയോഗത്തില്‍ പുതിയ ഭാരവാഹികളെ തെരെഞെടുത്തു. തുടര്‍ന്ന് അധികാര കൈമാറ്റവും നടന്നു. പ്രസിഡന്റായി കിഴക്കുമ്പാട്ട് അബ്ദുറഹ്മാന്‍, വൈ. പ്രസിഡന്റായി പരപ്പില്‍ മുഹമ്മദലി, ജനറല്‍ സെക്രട്ടറിയായി വലിയാക്കതൊടി പൂക്കോയ തങ്ങള്‍, ജോ.സെക്രട്ടറിയായി ടി.പി നാസര്‍, ട്രഷററായി കടശ്ശേരിവളപ്പില്‍ യാഹു എന്നിവരെ തെരഞ്ഞെടുത്തു.