വള്ളികുന്നം: രാജ്യത്ത് ഏക സിവില്‍ കോഡ് നടപ്പിലാക്കാന്‍ ശ്രമിക്കുന്നതിനുപിന്നില്‍ ഫാസിസ്റ്റ് വത്ക്കരണം കൊണ്ടുവരാനുള്ള സംഘപരിവാര്‍ അജണ്ടയാണെന്ന് ആര്‍. രാജേഷ് എം.എല്‍.എ. കേരള മുസ്‌ലിം യുവജന ഫെഡറേഷന്‍ വള്ളികുന്നം കാഞ്ഞിരത്തുംമൂടില്‍ സംഘടിപ്പിച്ച ഏക സിവില്‍കോഡ് വിരുദ്ധ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. മതേതരമൂല്യങ്ങളും ജനാധിപത്യമൂല്യങ്ങളും ഉയര്‍ത്തിപ്പിടിച്ചതുകൊണ്ടാണ് നമ്മുടെ രാജ്യത്ത് ഇന്ന് കാണുന്ന പുരോഗതിയുടെയൊക്കെ അടിസ്ഥാനം. ഭരണഘടന ഉറപ്പ് നല്‍കുന്ന മതസ്വാതന്ത്ര്യം വ്യത്യസ്ത സംസ്‌കാരങ്ങളും നിലനില്‍ക്കുന്ന നമ്മുടെ രാജ്യത്ത് ഏകസിവില്‍കോഡ് പ്രായോഗികമല്ല.
ബഹുസ്വര സമൂഹത്തില്‍ നിലനില്‍ക്കുന്ന വൈവിദ്ധ്യങ്ങളെ തകര്‍ക്കാനുള്ള നീക്കമാണ് സംഘപരിവാര്‍ നടത്തുന്നത്. ഇസ്‌ലാമിക് സ്റ്റേറ്റ് വാദവും ഹിന്ദുത്വരാഷ്ട്രവാദവും ഒരേപോലെ എതിര്‍ക്കപ്പെടേണ്ടതാണ്. നോട്ട് നിരോധന പ്രതിസന്ധി മൂലം രാജ്യത്ത് ജനജീവിതം ദുരിതപൂര്‍ണ്ണമായിട്ടും പ്രധാനമന്ത്രി നരേന്ദ്രമോദി കോര്‍പ്പറേറ്റുകളുടെ താല്‍പര്യം സംരക്ഷിക്കാനാണ് ശ്രമിക്കുന്നതെന്നും ആര്‍. രാജേഷ് കുറ്റപ്പെടുത്തി.