നിലമ്പൂരിലെ 'ഘടകകക്ഷികള്' ചങ്ങലയിലും ഇടഞ്ഞുതന്നെ
നിലമ്പൂര്: കേന്ദ്രസര്ക്കാരിനെതിരേ എല്.ഡി.എഫ് ആഹ്വാനം ചെയ്ത മനുഷ്യച്ചങ്ങലയില് നിലമ്പൂരിലെ സി.പി.എമ്മും സി.പി.ഐയും പങ്കെടുത്തതു രണ്ടിടങ്ങളില്. സി.പി.എമ്മും മറ്റ് ഘടകകക്ഷികളും കോട്ടക്കല് ചങ്കുവെട്ടിയിലെ ചങ്ങലയില് അണിനിരന്നപ്പോള് സി.പി.ഐ യൂനിവേഴ്സിറ്റി കാക്കഞ്ചേരിയിലാണ് പങ്കെടുത്തത്.
സംസ്ഥാനത്ത് ഒന്നാകെ സി.പി.എം-സി.പി.ഐ പ്രവര്ത്തകര് ഒരുമിച്ച് ചങ്ങലയില് പങ്കെടുത്തപ്പോഴാണ് ഒരു മുന്നണിയിലാണെങ്കിലും പരസ്പരം വിട്ടുവീഴ്ചയ്ക്ക് തയാറല്ലെന്നു വ്യക്തമാക്കി നിലമ്പൂരിലെ സി.പി.എമ്മും സി.പി.ഐയും കിലോമീറ്ററുകള് അകലെ രണ്ടിടങ്ങളിലായി പങ്കെടുത്തത്. സി.പി.എമ്മിന്റെ നേതൃത്വത്തില് നടക്കുന്ന എല്.ഡി.എഫ് പരിപാടികളില് സി.പി.ഐ കുറേക്കാലമായി വിട്ടുനില്ക്കുകയാണ്. നിലമ്പൂരിലെ ഗവ. കോളജ് വിഷയത്തിലും സി.പി.എം നിലപാടിന് കടകവിരുദ്ധമായ നിലപാടുമായി യു.ഡി.എഫിന്റെ സര്വകക്ഷിസംഘത്തില് സി.പി.ഐ ചേര്ന്നിരുന്നു.
ആയിരം കുടുംബങ്ങളെ സി.പി.എമ്മിലേക്ക് ചേര്ക്കുമെന്ന് പറഞ്ഞ് ചന്തക്കുന്നില് നടത്തിയ പരിപാടിയില് സി.പി.ഐ നേതാക്കള്ക്ക് മാത്രമാണ് വിലക്കേര്പ്പെടുത്തിയിരുന്നത്. കാനം രാജേന്ദ്രനെ പങ്കെടുപ്പിച്ച് മിനി ബൈപാസ് റോഡില് 180 കുടുംബങ്ങളെ പാര്ട്ടിയില് ചേര്ത്താണ് ഇതിന് സി.പി.ഐ മറുപടി നല്കിയത്.
Comments (0)
Disclaimer: "The website reserves the right to moderate, edit, or remove any comments that violate the guidelines or terms of service."