നീലേശ്വരം: അംബികാസുതന്‍ മാങ്ങാടിന്റെ മരക്കാപ്പിലെ തെയ്യങ്ങള്‍ എന്ന നോവലിലെ കഥാപാത്രമായ ഉമ്പിച്ചിക്കു മണലില്‍ പുനര്‍ജനി. ചായ്യോത്ത് ഗവ.ഹയര്‍സെക്കന്‍ഡറി സ്‌കൂളിലെ എന്‍.എസ്.എസ് വളണ്ടിയര്‍മാരാണു സപ്തദിന ക്യാംപിന്റെ ഭാഗമായി ഉമ്പിച്ചിയെ മണലില്‍ തീര്‍ത്തത്.
പ്രകൃതി നേരിടുന്ന ചൂഷണത്തിനെതിരേയുള്ള പ്രതിഷേധമെന്ന നിലയിലാണു ഈ കഥാപാത്രത്തെ പുനസൃഷ്ടിച്ചത്. മരക്കാപ്പ് കടപ്പുറത്തു നടന്ന ശില്‍പ നിര്‍മാണത്തിനു ജോസഫ് പതിയില്‍, ഉണ്ണികൃഷ്ണന്‍ മാസ്റ്റര്‍, പ്രോഗ്രാം ഓഫിസര്‍ ആര്‍ സന്ദീപ് എന്നിവര്‍ നേതൃത്വം നല്‍കി. ഇതോടൊപ്പം നിര്‍മിച്ച കടലാമയുടെ മണല്‍ശില്‍പവും ശ്രദ്ധേയമായി.
ക്യാംപില്‍ കഥാകാരന്‍ അംബികാസുതന്‍ മാങ്ങാട്, റോബിന്‍ വര്‍ഗീസ് വയനാട്, ശ്രീജിത് നീലായി, പങ്കജ് അയികോമത്ത്, പ്രവീണ്‍ നെയ്തല്‍, പി.വി ദിവാകരന്‍ തുടങ്ങിയവര്‍ ക്ലാസെടുത്തു.