കൊച്ചി: പാരിസ്ഥിതികാനുമതിയോടു കൂടിയ പെര്‍മിറ്റില്ലാതെ ക്വാറി പ്രവര്‍ത്തനങ്ങള്‍ നടക്കുന്നില്ലെന്ന് സര്‍ക്കാരും മലിനീകരണ നിയന്ത്രണ ബോര്‍ഡും ഉറപ്പാക്കണമെന്ന് ഹൈക്കോടതി നിര്‍ദേശിച്ചു.
പത്തനംതിട്ട ജില്ലയിലെ ചിറ്റാറില്‍ ഡെല്‍റ്റ അഗ്രിഗേറ്റ് ആന്‍ഡ് സാന്‍ഡ് പ്രൈവറ്റ് ലിമിറ്റഡിന്റെ കാലാവധി കഴിഞ്ഞ ക്രഷര്‍ -ക്വാറി യൂനിറ്റിന്റെ പ്രവര്‍ത്തനം തടയണമെന്ന് ചൂണ്ടിക്കാട്ടി ചിറ്റാര്‍ സ്വദേശി ഇ.എ ഷാജഹാന്‍ നല്‍കിയ ഹര്‍ജിയിലാണു സിംഗിള്‍ബെഞ്ചിന്റെ നിര്‍ദേശം.
പെര്‍മിറ്റ് കാലാവധി കഴിഞ്ഞ സാഹചര്യത്തില്‍ ക്രഷര്‍ യൂനിറ്റിന്റെ കാലാവധി നീട്ടി നല്‍കാന്‍ അപേക്ഷ ലഭിച്ചിട്ടുണ്ടെന്നും ഇക്കാര്യത്തില്‍ പരാതിക്കാരന്റെ അഭിപ്രായം കേട്ടശേഷമേ തീര്‍പ്പുണ്ടാക്കൂവെന്നും മലിനീകരണ നിയന്ത്രണ ബോര്‍ഡ് അറിയിച്ചു.
തുടര്‍ന്നാണു പാരിസ്ഥിതികാനുമതിയോടു കൂടിയുള്ള പെര്‍മിറ്റില്ലാത്ത ക്വാറികള്‍ പ്രവര്‍ത്തിക്കുന്നില്ലെന്ന് അധികൃതര്‍ ഉറപ്പാക്കാന്‍ ഹൈക്കോടതി നിര്‍ദേശിച്ചത്