ഇസ്താംബൂള്‍: തുര്‍ക്കി പ്രസിഡന്റ് റജബ് ത്വയ്യിബ് ഉര്‍ദുഗാനും എ.കെ പാര്‍ട്ടി(ജസ്റ്റിസ് ആന്‍ഡ് ഡവലപ്‌മെന്റ് പാര്‍ട്ടി)യും മുന്നോട്ടുവച്ച വിവാദ ഭരണഘടനാ പരിഷ്‌കരണത്തിനു കഴിഞ്ഞ ദിവസം പാര്‍ലമെന്റ് ഭരണഘടനാ കമ്മിഷന്‍ അംഗീകാരം നല്‍കി.
രാജ്യത്തെ പാര്‍ലമെന്ററി വ്യവസ്ഥയില്‍നിന്ന് പ്രസിഡന്റ് വ്യവസ്ഥയിലേക്കു മാറ്റുന്നതാണു പുതിയ പരിഷ്‌കരണം. ഇതോടെ ഭരണ, നിയമ നിര്‍വഹണ അധികാരങ്ങള്‍ പാര്‍ലമെന്റില്‍നിന്നും പ്രധാനമന്ത്രിയില്‍നിന്നും പ്രസിഡന്റിലേക്കു നീങ്ങും. നിലവില്‍ ഉപചാരപരമായ അധികാരം മാത്രമാണ് തുര്‍ക്കിയില്‍ പ്രസിഡന്റിനുള്ളത്.
പുതിയ ബില്ല് ജനുവരിയില്‍ പാര്‍ലമെന്റില്‍ ചര്‍ച്ചയ്ക്കു വയ്ക്കുമെന്നാണു പ്രതീക്ഷിക്കപ്പെടുന്നത്. 550 അംഗ പാര്‍ലമെന്റില്‍ പരിഷ്‌കരണം നടപ്പാകണമെങ്കില്‍ ചുരുങ്ങിയത് 330 പേരാണ് ആവശ്യമുള്ളത്. നിലവില്‍ എ.കെ പാര്‍ട്ടിക്കൊപ്പം അള്‍ട്രാ കണ്‍സര്‍വേറ്റിവ് പാര്‍ട്ടിയായ എം.എച്ച്.പിയും പരിഷ്‌കരണത്തെ പിന്താങ്ങുന്നുണ്ട്. ഇടതുപക്ഷ ആഭിമുഖ്യമുള്ള സി.എച്ച്.പിയും കുര്‍ദിഷ് അനുകൂല എച്ച്.ഡി.പിയും പുതിയ ഭരണഘടനാ പരിഷ്‌കരണത്തെ നേരത്തെ തന്നെ അപലപിച്ചിരുന്നു.
കഴിഞ്ഞ ജൂലൈയില്‍ നടന്ന സൈനിക അട്ടിമറിക്കു പിന്നില്‍ രാജ്യത്തിന്റെ അധികാരം പിടിച്ചടക്കാനുള്ള ഉര്‍ദുഗാന്റെ തന്ത്രമാണെന്ന് ആരോപണമുയര്‍ന്നിരുന്നു.