ഹാനോയ്: മനുഷ്യാവകാശം അനുവദിക്കുന്നത് രാജ്യത്തിന്റെ സ്ഥിരതയ്ക്ക് ഭീഷണിയല്ലെന്ന് യു.എസ് പ്രസിഡന്റ് ബരാക് ഒബാമ. വിയറ്റ്‌നാമില്‍ നിന്ന് മടങ്ങാനിരിക്കെ നടത്തിയ പ്രസംഗത്തിലാണ് ഇക്കാര്യം പറഞ്ഞത്. കമ്മ്യൂണിസ്റ്റ്  വിയറ്റ്‌നാമില്‍ കൂടുതല്‍ മനുഷ്യാവകാശം അനുവദിക്കണമെന്നായിരുന്നു ഒബാമയുടെ ആവശ്യം. നേരത്തെ കമ്മ്യൂണിസ്റ്റ് ക്യൂബയിലും ഇതേ പ്രസ്താവന നടത്തിയാണ് ഒബാമ മടങ്ങിയത്. കഴിഞ്ഞ ദിവസം ഹാനോയിലെത്തിയ ഒബാമ വിയറ്റ്‌നാമിനെതിരേയുള്ള ഉപരോധം നീക്കുന്നത് സംബന്ധിച്ച പ്രഖ്യാപനം നടത്തിയിരുന്നു. യു.എസിന്റെ ഈ നിലപാടില്‍ ചൈന അസന്തുഷ്ടി പ്രകടിപ്പിച്ചിട്ടുണ്ട്.
സ്ഥിരതയാണ് പുരോഗമനത്തിന്റെ അടിത്തറയെന്നും കമ്മ്യൂണിസ്റ്റ് പാര്‍ട്ടി നേതാക്കള്‍ തിങ്ങിനിറഞ്ഞ ഓഡിറ്റോറിയത്തില്‍ സംസാരിക്കവെ ഒബാമ പറഞ്ഞു.
1975 ല്‍ സമാപിച്ച വിയറ്റ്‌നാം യുദ്ധത്തിനു ശേഷം ഒരു സിറ്റിങ് യു.എസ് പ്രസിഡന്റ് വിയറ്റ്‌നാമിലെത്തുന്നത് ഇതാദ്യമാണ്. 1973ല്‍ യു.എസാണ് യുദ്ധത്തിന് നേതൃത്വം നല്‍കിയത്. ഇരു രാജ്യങ്ങളും തമ്മിലുള്ള ബന്ധം പുതുക്കാനാണ് യു.എസ് പ്രസിഡന്റിന്റെ സന്ദര്‍ശനം.