പാനൂര്‍: മാധ്യമ പ്രവര്‍ത്തകന്‍ കൂടിയായിരുന്ന മുന്‍മന്ത്രി പി.ആര്‍ കുറുപ്പിന്റെ ചരമവാര്‍ഷികാചരണത്തിന്റെ ഭാഗമായി ഒരുക്കിയ പാനൂര്‍ മേഖലയില്‍ പ്രവര്‍ത്തിക്കുന്ന പ്രാദേശിക മാധ്യമ പ്രവര്‍ത്തകരുടെ സംഗമം വേറിട്ട അനുഭവമായി. രാഷ്ടീയ സംഘര്‍ഷങ്ങള്‍ക്ക് എന്നും വേദിയായിരുന്ന പാനൂര്‍ മേഖലയില്‍ പലപ്പോഴും തങ്ങള്‍ക്ക് നേരിടേണ്ടി വന്നിരുന്ന ദുരനുഭവങ്ങളാണ് പലര്‍ക്കും പങ്ക് വെക്കാനുണ്ടായിരുന്നത്. തങ്ങള്‍ നല്‍കിയ വാര്‍ത്തകള്‍ എങ്ങനെ സമൂഹത്തിന് നേട്ടമായി എന്ന കാര്യവും മാധ്യമ പ്രവര്‍ത്തകര്‍ പങ്കുവച്ചു. രാവെന്നോ, പകലെന്നോ വ്യത്യാസമില്ലാതെ തങ്ങള്‍ക്ക് ചുറ്റും കാണുന്ന കാര്യങ്ങള്‍ വാര്‍ത്തയാക്കി അധികൃതരുടെ ശ്രദ്ധയില്‍ കൊണ്ടുവന്ന് പരിഹാരം കാണുമ്പോഴും പ്രാദേശിക മാധ്യമ പ്രവര്‍ത്തകരുടെ പല പ്രശ്‌നങ്ങളും പരിഹരിക്കപ്പെടുന്നില്ലെന്നും ഇവര്‍ ചൂണ്ടിക്കാട്ടി. മാതൃഭൂമി കണ്ണൂര്‍ ബ്യൂറോ ചീഫ് കെ ബാലകൃഷ്ണന്‍ ഉദ്ഘാടനം ചെയ്തു. പാനൂര്‍ പ്രസ്‌ഫോറം പ്രസിഡന്റ് കെ.കെ സജീവ് കുമാര്‍ അധ്യക്ഷനായി. വി.പി.സി പാനൂര്‍, വി.പി ജിതേഷ്, നൗഷാദ് അണിയാരം, ടി.പി നൗഫല്‍, റഷീദ് അണിയാരം, ശശീന്ദ്രന്‍ പാട്യം എന്നിവര്‍ അനുഭവങ്ങള്‍ പങ്കുവച്ചു.