കൊല്ലം: ഇരുമുടിക്കെട്ടുമായി ജില്ലാ-സംസ്ഥാന-ദേശീയ റോളര്‍ സകേറ്റിങ് താരങ്ങളുടെ ശബരിമല സകേറ്റിംഗ് റാലി നാളെ കൊല്ലത്ത് നിന്നും ആരംഭിക്കും. രാവിലെ ആറിന് കലക്ടറേറ്റിന് സമീപം കൊട്ടാരക്കുളം ഗണപതി ക്ഷേത്രത്തിനു മുന്നില്‍ നിന്നാണ് റാലി പുറപ്പെടുന്നത്.
'സ്‌പോര്‍ട്‌സിലൂടെ ആരോഗ്യം നേടൂ, ജീവിത ശൈലി രോഗങ്ങള്‍ ഒഴിവാക്കൂ, ശുചിത്വകേരളം സുന്ദര കേരളം' എന്നീ സന്ദേശവുമായിട്ടാണ് റാലി നടത്തുന്നത്.
ഹൈസ്‌കൂള്‍ കവല, അഞ്ചാലുംമൂട്, പെരിനാട്, കുണ്ടറ, കൊട്ടാരക്കര, അടൂര്‍ വഴി പത്തനംതിട്ടയിലെത്തി കവലയിലെ ഗാന്ധി പ്രതിമയ്ക്ക് മുന്നില്‍ പുഷ്പാര്‍ച്ചന നടത്തിയ ശേഷം സന്ധ്യയോടെ റാലി റാന്നി പെരുനാട്ട് എത്തിച്ചേരും.
ചൊവ്വാഴ്ച്ച രാവിലെ പെരുനാട്ട് നിന്നും പുറപ്പെടുന്ന റാലി ളാഹ വഴി പമ്പയില്‍ സമാപിക്കും. തുടര്‍ന്ന് സകേറ്റിങ് താരങ്ങള്‍ കാല്‍നടയായി ശബരിമലയിലേക്ക് പോകും.
സ്പീഡ്, ആര്‍ട്ടിസ്റ്റിക്, റോളര്‍ ഹോക്കി താരങ്ങളും പരിശീലകരുമായ പി.ആര്‍ ബാലഗോപാല്‍, എസ്. ബിജു, അനുരാജ് പൈങ്ങാവില്‍, വിഷ്ണു വിശ്വനാഥ്, ടി.എസ് ആദര്‍ശ്, പി.വി.എബിന്‍, പി.എന്‍ അമിത്, ജി. ഗോപു, ബി.ജി ബാല്‍ശ്രേയസ്, സിബി സുകുമാര്‍ തുടങ്ങിയവരാണ് റാലിയില്‍ പങ്കെടുക്കുന്നത്.
തുടര്‍ച്ചയായി പതിനേഴാമത്തെ റോളര്‍സകേറ്റിങ് റാലിയാണ് കൊല്ലത്ത് നിന്നും ശബരിമലയിലേക്ക് പോകുന്നതെന്ന് സംഘാടകര്‍ പറഞ്ഞു.