മംഗളൂരു: മംഗളൂരുവില്‍നിന്നുള്ള ജെറ്റ് എയര്‍വേഴ്‌സിന്റെ മംഗളൂരു-ഷാര്‍ജ വിമാനം ഇന്നലെ പൊടുന്നനെ യാത്ര റദ്ദാക്കിയതു യാത്രക്കാര്‍ക്കിടയില്‍ പ്രതിഷേധത്തിനിടയാക്കി.

168 പേരുമായി രാവിലെ ഒന്‍പതിനു പുറപ്പെടേണ്ട വിമാനം ആദ്യം ഒന്നര മണിക്കൂര്‍ വൈകി 10.30നു പുറപ്പെടും എന്നറിയിച്ചിരുന്നു. 10 മണിയോടെ വിമാനം ഉച്ചയ്ക്ക് 1.30നു മാത്രമേ പുറപ്പെടുകയുള്ളൂവെന്നുള്ള രണ്ടാമത്തെ അറിയിപ്പും വന്നിരുന്നു. ശേഷം 11 മണിയോടെ വിമാനം റദ്ദു ചെയ്തതായി അറിയിച്ചതോടെ യാത്രക്കാര്‍ ക്ഷുഭിതരായി. വിമാനം റദ്ദ് ചെയ്തതിനു കാരണം അറിയിക്കാന്‍ അധികൃതര്‍ തയാറാവാത്തതും റദ്ദ് ചെയ്ത വിമാനത്തിനു പകരം വിമാനം ഏര്‍പ്പെടുത്താത്തതും യാത്രക്കാര്‍ക്കിടയില്‍ പ്രതിഷേധമുയര്‍ത്തി.
യാത്രക്കാര്‍ സ്വരം കടുപ്പിച്ചതോടെ, മുംബൈയില്‍നിന്ന് ഷാര്‍ജയിലേക്കു പോകേണ്ട വിമാനം ഇവിടെയുള്ള യാത്രക്കാരെ എടുക്കാന്‍ എത്തുമെന്നാണു പ്രതീക്ഷിച്ചിരുന്നതെന്നും മൂടല്‍മഞ്ഞു കാരണം മസ്‌കത്തില്‍ പിടിച്ചിട്ടതാണ് വിമാനം റദ്ദ്‌ചെയ്യാന്‍ കാരണമെന്നും വിമാനത്താവള അധികൃതര്‍ വ്യക്തമാക്കി.