തിരുവല്ല: 29 -ാമത് സംസ്ഥാന കേരളോത്സവത്തില്‍ പാലക്കാട് മുന്നില്‍. തിരുവനന്തപുരമാണ് തൊട്ടുപിന്നില്‍. ആലപ്പുഴയാണ് മൂന്നാം സ്ഥാനത്ത്. ഇന്നലെ രാത്രി ഏഴുവരെ നടന്ന കലാകായിക മത്സരങ്ങളുടെ ഫലം പുറത്തുവന്നപ്പോള്‍ പാലക്കാട് ജില്ല 158 പോയിന്റുകള്‍ നേടി. തിരുവനന്തപുരം 143 പോയിന്റും ആലപ്പുഴ 103 പോയിന്റും നേടി. പതിനാറ് വേദികളിലായി നടക്കുന്ന കലാകായിക മത്സരങ്ങളില്‍ പതിനാല് ജില്ലകളില്‍ നിന്നായി നാലായിരത്തോളം പ്രതിഭകളാണ് മാറ്റുരയ്ക്കുന്നത്. കേരളോത്സവത്തിന്റെ ഔദ്യോഗിക ഉദ്ഘാടനം മുഖ്യമന്ത്രി പിണറായി വിജയന്‍ ഇന്നലെ നിര്‍വഹിച്ചു. ഇതിന് മുന്നോടിയായി കലാരൂപങ്ങളുടെയും വാദ്യമേളങ്ങളുടെയും അകമ്പടിയോടെ നടന്ന സാംസ്‌കാരിക ഘോഷയാത്രയില്‍ ആയിരങ്ങള്‍ പങ്കെടുത്തു. നാളെ സമാപിക്കും. സമാപന സമ്മേളനം ജലവിഭവ മന്ത്രി മാത്യു ടി. തോമസ് ഉദ്ഘാടനം ചെയ്യും.