കോഴിക്കോട്: പുതുവത്സര ദിനത്തോടനുബന്ധിച്ച് ചെറുവാടി ഡെവലപ്‌മെന്റ് ഫോറം, ലയണ്‍സ് ക്ലബ് ഓഫ് കാലിക്കറ്റ് സില്‍വര്‍ഹില്‍ എന്നിവരുടെ സംയുക്താഭിമുഖ്യത്തില്‍ കോഴിക്കോട് ബീച്ചിലെ പ്ലാസ്റ്റിക്, ഖരമാലിന്യങ്ങള്‍ നീക്കം ചെയ്തു. രാവിലെ 10ന് തുടങ്ങിയ ശുചീകരണ പ്രവൃത്തി ലയണ്‍സ് ക്ലബ് റീജ്യനല്‍ ചെയര്‍മാന്‍ സുബൈര്‍ കൊളക്കാടന്‍ ഉദ്ഘാടനം ചെയ്തു. ലയണ്‍സ് ക്ലബ് പ്രസിഡന്റ് ശ്രീജിത്ത്, ചെറുവാടി ഡെവലപ്‌മെന്റ് ഫോറം അംഗങ്ങളായ നിയാസ്, സലീം, ഗുലാം കൊളക്കാടന്‍ ശുചീകരണ പ്രവൃത്തിക്ക് നേതൃത്വം നല്‍കി.
ഉച്ചയ്ക്ക് ഒന്നു വരെ നീണ്ട ശുചീകരണ പ്രവര്‍ത്തനങ്ങളില്‍ 65ഓളം പ്രവര്‍ത്തകര്‍ പങ്കാളികളായി. പ്ലാസ്റ്റിക് മാലിന്യങ്ങള്‍ തരംതിരിച്ച് ശേഖരിച്ച ശേഷം സംസ്‌കരിക്കാനായി ഇവ കോര്‍പറേഷന് നല്‍കി. ശുചീകരണ പ്രവൃത്തി ഒരുവര്‍ഷം നീണ്ടുനില്‍ക്കുമെന്നും ഇതിന്റെ ഭാഗമായി എട്ടിന് താമരശേരി ചുരം ശുചീകരിക്കുമെന്നും സംഘാടകര്‍ പറഞ്ഞു.