തിരുവനന്തപുരം: കെ.എസ്.ആര്‍.ടി.സി ജീവനക്കാരുമായി സര്‍ക്കാര്‍ ഇന്ന് ചര്‍ച്ച നടത്തും. പണിമുടക്കിന് നോട്ടീസ് നല്‍കിയ സാഹചര്യത്തിലാണ് ജീവനക്കാരുമായി മന്ത്രി വീണ്ടും ചര്‍ച്ചക്കു തയാറായത്. കഴിഞ്ഞ മാസം 20ന് നടന്ന മന്ത്രിതല ചര്‍ച്ചയില്‍ ജീവനക്കാര്‍ മുന്നോട്ടു വെച്ച ആവശ്യങ്ങളെല്ലാം അംഗീകരിച്ചിരുന്നു.
എന്നാല്‍ സര്‍ക്കാര്‍ ഇതില്‍ നിന്ന് പിന്നോട്ടുപോയ സാഹചര്യത്തിലാണ് വീണ്ടും പണിമുടക്കിന് ജീവനക്കാര്‍ നോട്ടീസ് നല്‍കിയത്.
തൊഴിലാളികള്‍ക്കും, ഓഫിസര്‍മാര്‍ക്കും, പെന്‍ഷന്‍കാര്‍ക്കും അനുവദിച്ച ആറുശതമാനം ക്ഷാമബത്ത മരവിപ്പിച്ച നടപടി പിന്‍വലിക്കുക, ശമ്പളവും പെന്‍ഷനും മുടക്കം കൂടാതെ നല്‍കുക, താല്‍ക്കാലിക ജീവനക്കാരെ പിരിച്ചുവിടുന്ന നടപടികള്‍ അവസാനിപ്പിക്കുക, 28-11-2016ല്‍ ജോലിക്ക് ഹാജരാകാന്‍ കഴിയാത്തവരുടെ ശമ്പളം തടഞ്ഞുവച്ച ഉത്തരവ് റദ്ദാക്കുക, കെ.എസ്.ആര്‍.ടി.സി പ്രതിസന്ധി പരിഹരിക്കാന്‍ സര്‍ക്കാര്‍ അടിയന്തിരമായി ഇടപെടുക എന്നീ ആവശ്യങ്ങളാണ് ജീവനക്കാര്‍ വീണ്ടും ഉന്നയിക്കുന്നത്.
സര്‍ക്കാര്‍ അനുകൂല സംഘടനയായ സി.പി.ഐയുടെ തൊഴിലാളി യൂനിയനാണ് പണിമുടക്ക് നോട്ടീസ് നല്‍കിയിരിക്കുന്നത്. (കേരള ട്രാന്‍സ്‌പോര്‍ട് എംപ്ലോയീസ് യൂനിയന്‍) ഇതോടൊപ്പം ഐ.എന്‍.ടി.യു.സിയും, ബി.എം.എസും നോട്ടീസ് നല്‍കിയിട്ടുണ്ട്. സി.ഐ.ടി.യു സമരത്തില്‍ നിന്ന് വിട്ടുനില്‍ക്കുകയാണ്.
സാമ്പത്തിക പ്രതിസന്ധി രൂക്ഷമായിരിക്കുന്ന സാഹചര്യത്തില്‍ പണിമുടക്കു കൂടി നടന്നാല്‍ കെ.എസ്.ആര്‍.ടി.സി കടക്കെണിയിലേക്കു പോകും. അതൊഴിവാക്കാന്‍ കൂടിയാണ് ജീവനക്കാരെ സര്‍ക്കാര്‍ ചര്‍ച്ചയ്ക്കു വിളിച്ചിരിക്കുന്നത്.
ഇന്നു നടക്കുന്ന ചര്‍ച്ച പരാജയപ്പെട്ടാല്‍ നാളെ സൂചനാ പണിമുടക്കും, അതിനു ശേഷം അനിശ്ചിതകാല പണിമുടക്കിനുമാണ് ജീവനക്കാര്‍ ആലോചിക്കുന്നത്.