ദോഹ. ലോക രണ്ടാം നമ്പര്‍ താരം സെര്‍ബിയയുടെ നൊവാക് ദ്യോകോവിച് ഖത്തര്‍ എക്‌സണ്‍മൊബില്‍ ഓപ്പണ്‍ ടെന്നീസില്‍ ആദ്യ റൗണ്ടില്‍ ജയിച്ചു.

ഖലീഫ ടെന്നീസ് ആന്‍ഡ് സ്‌ക്വാഷ് കോംപ്ലക്‌സിലെ സെന്റര്‍കോര്‍ട്ടില്‍ നടന്ന ഒന്നാംറൗണ്ട് മത്സരത്തില്‍ ജര്‍മ്മനിയുടെ ലോക 63ാം നമ്പര്‍ താരം ജാന്‍ ലെന്നാര്‍ഡ് സ്ട്രഫിനെയാണ് പരാജയപ്പെടുത്തിയത്, സ്‌കോര്‍ 76, 63. ആദ്യ സെറ്റില്‍ ദ്യോക്കോവിച്ചിന് ജര്‍മ്മന്‍താരം കടുത്ത വെല്ലുവിളിയാണ് ഉയര്‍ത്തിയത്.

ആദ്യ നാലു ഗെയിമുകളും നഷ്ടപ്പെടുത്തിയ ദ്യോക്കോവിച്ച് ആദ്യ സെറ്റില്‍ 25 എന്ന സ്‌കോറില്‍ പിന്നില്‍ നിന്നശേഷമാണ് മത്സരത്തിലേക്ക് തിരിച്ചുവന്നത്. ആദ്യ സെറ്റ് ടൈബ്രേക്കറിലേക്ക് നീണ്ടെങ്കിലും രണ്ടാം സെറ്റില്‍ ദ്യോക്കോവിച്ചിന്റെ ആധിപത്യമായിരുന്നു.

ലോക പതിനൊന്നാം നമ്പര്‍ താരവും ടൂര്‍ണമെന്റിലെ നാലാം സീഡുമായ ഡേവിഡ് ഗോഫിന്‍, സ്‌പെയിനിന്റെ നിക്കോളസ് അല്‍മാര്‍ഗോ, ജര്‍മ്മനിയുടെ ഡസ്റ്റിന്‍ ബ്രൗണ്‍, ചെക്ക് റിപ്പബ്ലിക്കിന്റെ ജിരി വെസ്‌ലി, അര്‍ജന്റീനയുടെ ഹൊരാസിയോ സെബല്ലോസ് എന്നിവരും രണ്ടാം റൗണ്ടിലെത്തി.

ഹോളണ്ടിന്റെ റോബിന്‍ ഹാസിനെ 74, 62 എന്ന സ്‌കോറിന് ഗോഫിനും ഇറ്റലിയുടെ പൗളോ ലോറന്‍സിയെ 76, 46, 63 എന്ന സ്‌കോറിന് അല്‍മാര്‍ഗോയും അര്‍ജന്റീനയുടെ ഫാക്കുന്‍ഡോ ബാഗ്‌നിസിനെ 61, 67, 64 എന്ന സ്‌കോറിന് ബ്രൗണും തുര്‍ക്കിയുടെ അനില്‍ യുക്‌സെലിനെ 62, 63 എന്ന സ്‌കോറിന വെസ്‌ലിയും ജര്‍മനിയുടെ ഫ്‌ളോറിയന്‍ മയറിനെ 67, 64, 76 എന്ന സ്‌കോറിന് സെബല്ലോസും പരാജയപ്പെടുത്തുകയായിരുന്നു.

അതേസമയം ഡബിള്‍സില്‍ ബ്രിട്ടന്റെ ആന്‍ഡി മറേയും പോളണ്ടിന്റെ മരിയൂസ് ഫിര്‍സ്റ്റെന്‍ബര്‍ഗും ഉള്‍പ്പെട്ട സഖ്യം ആദ്യറൗണ്ടില്‍ തോറ്റുപുറത്തായി. സ്‌പെയിനിന്റെ ഡേവിഡ് മാരെരോ സെര്‍ബിയയുടെ നെനാദ് സിമോണ്‍ജിക് സഖ്യമാണ് 62, 64 എന്ന സ്‌കോറിന് ബ്രിട്ടീഷ്‌പോളിഷ് സഖ്യത്തെ തകര്‍ത്ത് ക്വാര്‍ട്ടറിലെത്തിയത്.

ഫ്രാന്‍സിന്റെ ജെറിമി ചാര്‍ഡി ഫാബ്രിസ് മാര്‍ട്ടിന്‍ സഖ്യവും ബ്രിട്ടണിന്റെ ഡൊമിനിക് ലിഗ്ലോട്ട് റുമാനിയയുടെ ഫ്‌ളോറിന്‍ മെര്‍ജിയ സഖ്യവും ക്വാര്‍ട്ടറിലെത്തി. സിംഗിള്‍സ് ഒന്നാം റൗണ്ടിനായി ലോക ഒന്നാംനമ്പര്‍ താരം ആന്‍ഡി മറേ ഇന്നിറങ്ങും. ഫ്രാന്‍സിന്റെ ജെറിമി ചാര്‍ഡിയാണ് എതിരാളി. മൂന്നാം സീഡ് ചെക്ക് റിപ്പബ്ലിക്കിന്റെ തോമസ് ബര്‍ഡിച്ച് യോഗ്യതാമത്സരം ജയിച്ചെത്തിയ ഇറ്റലിയുടെ അലസാണ്ട്രോ ഗിയന്നസിയെയും അഞ്ചാം സീഡ് ഫ്രാന്‍സിന്റെ തന്നെ ജോ വില്‍ഫ്രഡ് സോംഹ ഒന്നാം റൗണ്ടില്‍ റഷ്യയുടെ ആന്ദ്രെ കുസ്‌നെറ്റ്‌സോവിനെയും നേരിടും. വൈല്‍ഡ് കാര്‍ഡ് എന്‍ട്രി ലഭിച്ച ഖത്തറിന്റെ മുബാറക്ക് ഷനാന്‍ സയിദ് ആദ്യറൗണ്ടില്‍ റഷ്യയുടെ കരെന്‍ ഖചനോവിനെ നേരിടും. ഡബിള്‍സില്‍ വൈല്‍ഡ് കാര്‍ഡ് ലഭിച്ച ഖത്തറിന്റെ ജാബര്‍ മുഹമ്മദ് അല്‍ മുതാവ മൂസ ഷനാന്‍ സയിദ് സഖ്യം ജര്‍മ്മനിയുടെ ഫിലിപ്പ് പെറ്റ്ഷ്‌നര്‍ഹോളണ്ടിന്റെ റോബിന്‍ ഹാസ് സഖ്യത്തെ നേരിടും.