നാപിയര്‍: ഏകദിന പരമ്പര അടിയറവു വച്ചതിനു പിന്നാലെ നടന്ന ടി20 പരമ്പരയിലെ ആദ്യ മത്സരത്തിലും ന്യൂസിലന്‍ഡിനെതിരേ ബംഗ്ലാദേശിനു തോല്‍വി. ആറു വിക്കറ്റിനാണ് കിവികള്‍ പോരാട്ടം വിജയിച്ചത്. ആദ്യം ബാറ്റു ചെയ്ത ബംഗ്ലാദേശ് നിശ്ചിത 20 ഓവറില്‍ എട്ടു വിക്കറ്റിനു 141 റണ്‍സ് നേടി. മധ്യനിര ബാറ്റ്‌സ്മാന്‍ മുഹമ്മദുല്ല നേടിയ അര്‍ധ സെഞ്ച്വറിയാണ് (52) ബംഗ്ലാ നിരയ്ക്ക് പൊരുതാവുന്ന സ്‌കോര്‍ സമ്മാനിച്ചത്.
വിജയം തേടിയിറങ്ങിയ ന്യൂസിലന്‍ഡ് ഒരു ഘട്ടത്തില്‍ 62 റണ്‍സെടുക്കുന്നതിനിടെ നാലു വിക്കറ്റ് നഷ്ടമായി പതറിയിരുന്നു. എന്നാല്‍ ഓപണിങ് ഇറങ്ങിയ ക്യാപ്റ്റന്‍ കെയ്ന്‍ വില്യംസന്‍ ഒരറ്റത്തു നിന്നതോടെ കിവികള്‍ മുന്നോട്ടു പോയി. പുറത്താകാതെ 73 റണ്‍സോടെ നിലയുറപ്പിച്ചു കളിച്ച നായകന്‍ 41 റണ്‍സോടെ പുറത്താകാതെ നിന്ന ഗ്രാന്‍ഡ്‌ഹോമിനൊപ്പം 18 ഓവറില്‍ ടീമിനെ വിജയത്തിലേക്ക് നയിച്ചു.