തൃക്കരിപ്പൂര്‍: ജില്ലാ സ്‌കൂള്‍ കലോത്സവം വിളംബരം ചെയ്തുള്ള ഘോഷയാത്ര ഇന്നു വൈകിട്ട് മൂന്നിനു നടക്കാവില്‍ നിന്നു പ്രയാണം തുടങ്ങും. അത്യുത്തര ജില്ലയുടെ സാംസ്‌കാരിക പൈതൃകം വിളിച്ചോതുന്ന നിരവധി ഫ്‌ളോട്ടുകള്‍ ഉള്‍ക്കൊള്ളിച്ചിട്ടുള്ള വിളംബര ജാഥ വര്‍ണാഭമാക്കാന്‍ ഒരുക്കങ്ങള്‍ പൂര്‍ത്തിയായി. വര്‍ണക്കൊടി പാറിച്ചു സൈക്കിളില്‍ നീങ്ങുന്ന 24 കുട്ടികളില്‍ തുടങ്ങി പഞ്ചവാദ്യം, പൂമ്പാറ്റ കുഞ്ഞുങ്ങള്‍, പച്ചപ്പനന്തത്തകള്‍, കോല്‍ക്കളി, തിരുവാതിര, ഒപ്പന, ശിങ്കാരിമേളം തുടങ്ങിയവ വിളംബരജാഥയില്‍ അണിനിരക്കും. മികച്ച രണ്ടു ടാബ്ലോകള്‍ക്കു യഥാക്രമം 3500, 2500 രൂപവീതം സമ്മാനം നല്‍കും. അവതരണ ചെലവായ 2000 രൂപക്കു പുറമെയാണ് സമ്മാനം. പങ്കാളികള്‍ക്കു മൊമെന്റോയും സമ്മാനിക്കും. അന്‍പത്തിഏഴാമത് കലോത്സവത്തിന്റെ പ്രതീകമായി 57 മുത്തുക്കുടകള്‍ ചൂടിയ വനിതകള്‍ കേരളീയ വേഷത്തില്‍ അണിനിരക്കും. സ്റ്റേജിതര മത്സരങ്ങള്‍ വ്യാഴാഴ്ച നടക്കും. പ്രധാന വേദിയോടു ചേര്‍ന്നു പത്തു വേദികളിലാണു സ്റ്റേജിതര മത്സരങ്ങള്‍ നടക്കുക.