തിരൂര്‍: ഇരുപത്തിയൊന്‍പതാമത് ജില്ലാ സ്‌കൂള്‍ കലോത്സവത്തിനു തുടക്കമറിയിച്ചുള്ള സാംസ്‌കാരിക ഘോഷയാത്ര വര്‍ണാഭമായി. തിരൂര്‍ പൂങ്ങോട്ടുകുളത്തുനിന്നു പ്രധാന കലോത്സവ വേദികളുള്ള തെക്കുംമുറി ബോയ്‌സ് ഹയര്‍സെക്കന്‍ഡറി സ്‌കൂളിലേക്കായിരുന്നു ഘോഷയാത്ര.
സ്‌കൗട്ട് ആന്‍ഡ് ഗൈഡ്‌സ്, എന്‍.എസ്.എസ്, സ്റ്റുഡന്റ് പൊലിസ് കേഡറ്റുകള്‍, വിദ്യാര്‍ഥികള്‍, അധ്യാപകര്‍, രക്ഷിതാക്കള്‍, രാഷ്ട്രീയ, സാമൂഹിക, സാംസ്‌കാരിക മേഖലയിലുള്ളവര്‍ എന്നിവര്‍ ബാന്റ് വാദ്യത്തിന്റെയും ശിങ്കാരിമേളത്തിന്റെയും അകമ്പടിയോടെയുള്ള ഘോഷയാത്രയില്‍ അണിനിരന്നു. നിശ്ചല ദൃശ്യങ്ങളും പ്ലോട്ടുകളും ഘോഷയാത്രയ്ക്കു മിഴിവേകി. കലോത്സവത്തിനു തിരശ്ശീല ഉയര്‍ന്ന ഇന്നലെ വൈകിട്ട് നാലോടെയായിരുന്നു ഘോഷയാത്രയ്ക്കു തുടക്കമായത്. ഘോഷയാത്ര കടന്നുപോകുന്ന വഴിയില്‍ ഇരുവശങ്ങളിലുമായി കുട്ടികളോടൊപ്പം നൂറുകണക്കിനു കുടുംബാംഗങ്ങളും വ്യാപാരി വ്യവസായികളും കാഴ്ചക്കാരായും അണിനിരന്നു.