കണ്ണൂര്‍: സംസ്ഥാന സ്‌കൂള്‍ കലോത്സവത്തിന്റെ സ്വാഗതഗാനത്തിന്റെ ചിത്രീകരണം മുഖ്യവേദിക്കു മുന്‍പില്‍ നടന്നു. ഹെലികാമറ അടക്കം ഉപയോഗിച്ചുള്ള ചിത്രീകരണത്തില്‍ മേയര്‍ ഇ.പി ലത, ജില്ലാ പഞ്ചായത്ത് പ്രസിഡന്റ് കെ.വി സുമേഷ്, കലക്ടര്‍ മീര്‍ മുഹമ്മദലി, ജില്ലാ പൊലിസ് മേധാവി കോറി സഞ്ജയ് കുമാര്‍ ഗുരുദ്ദിന്‍, കൗണ്‍സിലര്‍ തൈക്കണ്ടി മുരളിധരന്‍, പ്രോഗ്രാം കമ്മിറ്റി കണ്‍വീനര്‍ കെ.സി രാജന്‍, സി.പി.സി പ്രേമരാജന്‍, ട്രാഫിക് എസ്.ഐ കെ സുധാകരന്‍, പ്രസ് ക്ലബ് പ്രസിഡന്റ് കെ.ടി ശശി തുടങ്ങിയവരും വിദ്യാര്‍ഥികളും അടക്കം നിരവധിപേര്‍ പങ്കെടുത്തു.
സാജു ഗംഗാധരനാണ് സംവിധാനം. വിഷ്ണു ബാലകൃഷ്ണന്‍, ഷിനോജ് കണ്ണൂര്‍ എന്നിവരാണ് കാമറ ചലിപ്പിക്കുന്നത്. അതേസമയം സംസ്ഥാന സ്‌കൂള്‍ കലോത്സവത്തിന്റെ ഒരുക്കങ്ങള്‍ വിലയിരുത്താന്‍ കലക്ടറുടെ നേതൃത്വത്തിലുള്ള സംഘം പ്രധാനവേദികള്‍ സന്ദര്‍ശിച്ചു. വേദികളായ പൊലിസ് മൈതാനം, സ്‌റ്റേഡിയം തുടങ്ങിയ സ്ഥലങ്ങള്‍ സന്ദര്‍ശിച്ച് ഒരുക്കങ്ങള്‍ വിലയിരുത്തി.