കൂത്തുപറമ്പ്: കായലോടിനടുത്ത് പറമ്പായിയില്‍ ആയുധങ്ങളുമായി ടാറ്റാ സുമോയില്‍ സഞ്ചരിക്കുകയായിരുന്ന നാലംഗ സംഘം പിടിയില്‍. തലശ്ശേരി ചേറ്റംകുന്നിലെ പി.കെ അനീഷ്(36), കാവുംഭാഗത്തെ സി സാജു(31), പ്രജിഷ്(35), വാവാച്ചി മുക്കിലെ പി.വി അശ്വിന്‍(23)എന്നിവരെയാണ് കൂത്തുപറമ്പ് എസ്.ഐ കെ.ജെ വിനോയിയും സംഘവും അറസ്റ്റു ചെയ്തത്. ഇവരില്‍ നിന്നു രണ്ട് വടിവാള്‍, ഒരു ഇരുമ്പുദണ്ഡ് എന്നിവ പിടികൂടി. ഇന്നലെ ഉച്ചയ്ക്ക് മൂന്നോടെ പറമ്പായിയില്‍ നിര്‍ത്തിയിട്ട കാറില്‍ അപരിചിതരായ സംഘത്തെ കണ്ട നാട്ടുകാര്‍ സംശയം തോന്നി പൊലിസില്‍ വിവരം അറിയിക്കുകയായിരുന്നു. പൊലിസ് വാനിന്റെ പിന്‍സീറ്റിനടിയില്‍ ഒളിപ്പിച്ച ആയുധങ്ങളും വാഹനത്തില്‍ നിന്നു ബി.ജെ.പിയുടെ കൊടിതോരണങ്ങളും പോസ്റ്ററുകളും കണ്ടെടുത്തു. വാഹനം കേടായതാണ് ഇവര്‍ പിടിയിലാകാന്‍ ഇടയാക്കിയത്.