ഇരിട്ടി:കൂട്ടുപുഴയിലും പേരാവൂരിലും എക്‌സൈസ് അധികൃതര്‍ അനധികൃത മദ്യം പിടിച്ചെടുത്തു. ഇരിട്ടി എക്‌സൈസ് സംഘം നടത്തിയ പരിശോധനയിലാണ് 336 കുപ്പി കര്‍ണാടക മദ്യം പിടികൂടിയത്.
കൂട്ടുപുഴ പാലത്തിന് സമീപം സ്‌നേഹ ഭവനിലേക്ക് പോകുന്ന റോഡിന് സമീപം പുഴയരികിലെ കുറ്റിക്കാട്ടില്‍ ഒളിപ്പിച്ച നിലയിലായിരുന്ന മദ്യകുപ്പികള്‍ ഇന്നലെ ഇരിട്ടി എക്‌സൈസ് ഇന്‍സ്‌പെക്ടര്‍ സി രഞ്ജിത്തിന്റെ നേതൃത്വത്തില്‍ എക്‌സൈസ് നടത്തിയ പരിശോധനയിലാണ് കണ്ടെത്തിയത്. 180 എം.എല്‍ വരുന്ന മദ്യക്കുപ്പികള്‍ എഴ് കാര്‍ഡ് ബോര്‍ഡ് പെട്ടികളിലാക്കി ഒളിപ്പിച്ചു വെച്ച നിലയിലായിരുന്നു.
കൂത്തുപറമ്പ്: മാഹിയില്‍ നിന്നു ഓട്ടോയില്‍ കടത്തിക്കൊണ്ടുവരികയായിരുന്ന 80 കുപ്പി മദ്യവുമായാണ് കൊട്ടിയൂര്‍ കണ്ടപ്പുറത്തെ ഈന്തുങ്കല്‍ ടോമി (42)യെ കൂത്തുപറമ്പ് എക്‌സൈസ് സര്‍ക്കിള്‍ ഓഫിസിലെ സബ് ഇന്‍സ്‌പെക്ടര്‍ എ.എസ് പുരുഷോത്തമനും സംഘവും അറസ്റ്റു ചെയ്തത്. ചൊവ്വാഴ്ച രാത്രി പേരാവൂരില്‍ വാഹന പരിശോധനയ്ക്കിടെയാണ് ഇയാള്‍ പിടിയിലായത്.
ഓട്ടോറിക്ഷയില്‍ നിര്‍മിച്ച പ്രത്യേക അറയിലായിരുന്നു മദ്യം സൂക്ഷിച്ചിരുന്നത്.
പേരാവൂര്‍ : പേരാവൂര്‍ റെയ്ഞ്ച് എക്‌സൈസ് സംഘം നടത്തിയ റെയ്ഡില്‍ ചെട്ട്യാംപറമ്പ് നരിക്കടവില്‍ വച്ച് ഇരുപത്തിനാല് കുപ്പി മാഹി മദ്യം പിടികൂടി. നരിക്കടവ് സ്വദേശി താന്നിമലയില്‍ തങ്കച്ചന്‍ എന്ന ജോണ്‍സന്‍ (47) നെ എക്‌സൈസ് സംഘം അറസ്റ്റ് ചെയ്തു. കൂത്തുപറമ്പ് കോടതിയില്‍ ഹാജരാക്കി പ്രതിയെ 14 ദിവസത്തേക്ക് റിമാന്‍ഡ് ചെയ്തു.