കാസര്‍കോട്: തിരുവല്ലയില്‍ നടന്ന സംസ്ഥാന കേരളോത്സവത്തില്‍ കാസര്‍കോട് ജില്ലക്കു ഓവറോള്‍ കിരീടം. കലാ മത്സരങ്ങളില്‍ 90ലധികം പോയിന്റ് നേടിയാണ് ഒന്നാതമെത്തിയത്. ദേശഭക്തിഗാനം, മലയാള നാടകം, ഗ്രൂപ്പ് ഡാന്‍സ്, നാടോടി നൃത്തം, കുച്ചിപ്പുടി, കോല്‍ക്കളി, സംഘഗാനം തുടങ്ങിയ ഇനങ്ങളില്‍ ഒന്നാം സ്ഥാനം ജില്ലക്കായിരുന്നു.
കേരളോത്സവ മത്സരയിനങ്ങളില്‍ ഏറ്റവും കൂടുതല്‍ പ്രേക്ഷകരെ ആകര്‍ഷിക്കുന്ന ഇനമായ മലയാള നാടകത്തില്‍ മത്സരിച്ച 10 നാടകങ്ങളില്‍ നിന്നാണ് യുവശക്തി അരവത്ത് അവതരിപ്പിച്ച 'സ്വതന്ത്രനായ' എന്ന നാടകം ഒന്നാം സ്ഥാനം കരസ്ഥമാക്കിയത്. പുരുഷ, വനിതാ വടംവലി മത്സരങ്ങളിലും ജില്ലയാണ് ജേതാക്കളായത്. ഈ നേട്ടത്തിന് പിന്നില്‍ പ്രവര്‍ത്തിച്ച എല്ലാ ക്ലബ് അംഗങ്ങളെയും ജില്ലാ പഞ്ചായത്ത് പ്രസിഡന്റ് എ.ജി.സി ബഷീറും സെക്രട്ടറി ഇ.പി രാജ്‌മോഹനും അഭിനന്ദിച്ചു.