കോഴിക്കോട്: 71-മത് സന്തോഷ് ട്രോഫി ഫുട്‌ബോള്‍ മത്സരത്തില്‍ കേരളത്തിന് വിജയത്തുടക്കം. എതിരില്ലാത്ത മൂന്ന് ഗോളുകള്‍ക്കാണ് പോണ്ടിച്ചേരിയെ പരാജയപ്പെടുത്തിയത്.

കളി തുടങ്ങി മൂന്നാം മിനിറ്റില്‍ തന്നെ കേരളം പോണ്ടിച്ചേരിയുടെ വലകുലുക്കി. പോസ്റ്റിന്റെ ഇടത് മൂലയില്‍ നിന്നും വന്ന കിക്ക് ജോബി ജസ്റ്റിന്‍ ഹെഡറിലൂടെ പന്ത് അനായാസം പോസ്റ്റിലെത്തിക്കുകയായിരുന്നു. പിന്നീട് നിരവധി അവസരങ്ങള്‍ ലഭിച്ചെങ്കിലും ആദ്യപകുതിയില്‍ മറ്റൊരു ഗോളും വലയിലെത്തിയില്ല. 62-ാം മിനിറ്റില്‍ ലഭിച്ച ത്രോയില്‍ നിന്നും ക്യാപ്റ്റന്‍ ഉസ്മാന്‍ ബാക്ക്ഹീല്‍ കിക്കിലൂടെ പന്ത് വലയിലെത്തിച്ചു.

രണ്ട് ഗോളിന്റെ ആധിപത്യത്തില്‍ വര്‍ധിച്ച ആത്മവിശ്വാസവുമായി കളിച്ച കേരളത്തിന് നിരവധി അവസരങ്ങള്‍ ലഭിച്ചു. മുന്നേറ്റ നിര താരങ്ങളായ സഹലും ജോബിയും പോണ്ടിച്ചേരി ഗോള്‍കീപ്പര്‍ ഡാനിയല്‍ റോക്കിനെ മാറിമാറി പരീക്ഷിച്ചു. 72-ാം മിനിറ്റില്‍ ബോക്‌സിനു പുറത്തു നിന്നും ലഭിച്ച പന്തുമായി പോസ്റ്റിനടുത്തേക്ക് ഒടിയെത്തിയ ഉസ്മാന്‍ പോണ്ടിച്ചേരി ഗോളിയെ കാഴ്ചക്കാരനാക്കി പന്ത് വലയിലെത്തിച്ചു.

ഇതോടെ കേരളത്തിന്റെ മൂന്നാം ഗോള്‍ പിറന്നു. കേരളത്തിന് പൂര്‍ണ ആധിപത്യമുണ്ടായിരുന്ന മത്സരത്തില്‍ കേരളത്തിന് ഗോള്‍ നേടാന്‍ നിരവധി അവസങ്ങള്‍ ലഭിച്ചെങ്കിലും മുതലാക്കാനായില്ല. കേരളത്തിന്റെ പ്രധിരോധം ഒന്നു കൂടി ശക്തിപ്പെടുത്താന്‍ ഷിബിന്‍ ലാലിനെകളത്തിലിറക്കിയതോടെ പോണ്ടിച്ചെരിയുടെ കളി സ്വന്തം ക്വാര്‍ട്ടറിലേക്ക് ചുരുങ്ങി.

ടൂര്‍ണമെന്റിലെ ആദ്യ മത്സരത്തില്‍ ആന്ധ്രാപ്രദേശ് ഒന്നിനെതിരേ രണ്ട്് ഗോളുകള്‍ക്ക് കര്‍ണാടകയെ പരാജയപ്പെടുത്തി. ആന്ധ്രാ ക്യാപ്റ്റന്‍ ടി. ചന്ദ്രശേകരന്റെ രണ്ട് പെനാല്‍റ്റി ഗോളിലൂടെയായിരുന്നു ആന്ധ്രയുടെ ജയം. നാളെ നടക്കുന്ന മത്സരത്തില്‍ സര്‍വീസസ് തെലങ്കാനയേയും തമിഴ്‌നാട് ലക്ഷദ്വീപിനെയും നേരിടും.