ദോഹ: പ്രവാസികളുടെ എക്‌സിറ്റ്, എന്‍ട്രി, റസിഡന്‍സ് എന്നിവയുമായി ബന്ധപ്പെട്ട നിയമത്തില്‍ അമീര്‍ ഭേദഗതി വരുത്തി ഉത്തരവിട്ടു. പുതിയ നിയമം നടപ്പില്‍ വന്ന് രണ്ടാഴ്ചയ്ക്കകമാണ് നിയമത്തിലെ എക്‌സിറ്റ് പെര്‍മിറ്റുമായി ബന്ധപ്പെട്ട നിബന്ധനയില്‍ മാറ്റം വരുത്തിയിരിക്കുന്നത്. അവധിക്കോ ജോലി ഒഴിവാക്കിയോ പോകുന്ന തൊഴിലാളി തൊഴിലുടമയെ അറിയിച്ചിരിക്കണമെന്നാണ് 2015ലെ 21-ാം നമ്പര്‍ നിയമത്തില്‍ അമീര്‍ വരുത്തിയ ഭേദഗതിയില്‍ പറയുന്നത്.

അമീര്‍ കഴിഞ്ഞ ദിവസം പുറപ്പെടുവിച്ച 2017ലെ ഒന്നാം നമ്പര്‍ നിയമത്തില്‍ രണ്ട് അനുഛേദങ്ങളാണുള്ളത്. ഇതില്‍ ആദ്യത്തെ അനുഛേദം 2015 ഒന്നാം നമ്പര്‍ നിയമത്തിലെ ഏഴാം അനുഛേദത്തിന് പകരമായി കൊണ്ടു വന്നതാണ്.

അതുപ്രകാരം വര്‍ക്ക് വിസയില്‍ വന്ന തൊഴിലാളിക്ക് അവധിക്കോ മറ്റ് അടിയന്തര കാരണങ്ങളാലോ തൊഴില്‍ കരാറില്‍ പറഞ്ഞത് പ്രകാരം തൊഴിലുടമയെ വിവരം ധരിപ്പിച്ച് രാജ്യം വിടാവുന്നതാണ്. കരാര്‍ കാലാവധി കഴിയുന്നതിന് മുമ്പുതന്നെ ജോലി രാജിവച്ച് തൊഴില്‍ കരാറില്‍ പറയും പ്രകാരം തൊഴിലുടമയെ അറിയിച്ച് രാജ്യം വിടാം. തൊഴിലുടമയോ ബന്ധപ്പെട്ട മറ്റാരെങ്കിലുമോ എക്‌സിറ്റ് അനുമതി നിഷേധിച്ചാല്‍ തൊഴിലാളിക്ക് പരാതി പരിഹാര കമ്മിറ്റിയെ സമീപിക്കാം. മൂന്ന് പ്രവര്‍ത്തി ദിവസത്തിനകം കമ്മിറ്റി ഇക്കാര്യത്തില്‍ തീരുമാനമെടുക്കും.

നിലവില്‍ 2015 21-ാം നമ്പര്‍ നിയമത്തിലെ ഏഴാം അനുഛേദത്തില്‍ രാജ്യം വിടുംമുമ്പ് തൊഴിലുടമയെ അറിയിക്കണമെന്ന കാര്യം പറയുന്നില്ല. പകരം ഓരോ തവണയും രാജ്യം വിടുന്നതിന് മൂന്ന് ദിവസം മുമ്പ് ബന്ധപ്പെട്ട സര്‍ക്കാര്‍ അതോറിറ്റിയെ അറിയിക്കണമെന്നാണു പറയുന്നത്. അമീര്‍ വരുത്തിയ ഭേദഗതി പ്രകാരം സര്‍ക്കാരിനെ അല്ല തൊഴിലുടമയെയാണ് വിവരമറിയിക്കേണ്ടത്.

നിയമം ഗസറ്റില്‍ പ്രസിദ്ധീകരിച്ചതിന്റെ രണ്ടാം ദിവസം മുതല്‍ ബന്ധപ്പെട്ട എല്ലാ വിഭാഗങ്ങളും ഇത് നടപ്പില്‍ വരുത്തണമെന്ന് അമീറിന്റെ ഉത്തരവിലുള്ള രണ്ടാം അനുഛേദത്തില്‍ വ്യക്തമാക്കുന്നു.

കോണ്‍ട്രാക്ട് അവസാനിക്കും മുമ്പ് ജോലി രാജിവച്ച് തൊഴിലുടമയെ അറിയിച്ച ശേഷം രാജ്യം വിടാമെന്ന വകുപ്പ് തൊഴിലാളികള്‍ക്ക് പ്രയോജനപ്രദമാവുമെന്നാണു കരുതുന്നത്. നേരത്തേ ഇത്തരത്തില്‍ ജോലി രാജിവയ്ക്കാന്‍ ആഗ്രഹിക്കുന്നവര്‍ക്ക് എക്‌സിറ്റ് പെര്‍മിറ്റ് നിഷേധിക്കുന്ന സാഹചര്യം ഉണ്ടായിരുന്നു. ഇത്തരക്കാര്‍ സ്‌പോണ്‍സറില്‍ നിന്ന് ഒളിച്ചോടി മറ്റു വല്ല സ്ഥലത്തും ജോലി തേടി കഴിയുകയായിരുന്നു പതിവ്. രേഖകളില്ലാതെ തുടരുന്ന ഇവരെ നിയമവിരുദ്ധ താമസക്കാരായാണ് പരിഗണിക്കുന്നത്.