കേപ് ടൗണ്‍: ശ്രീലങ്കക്കെതിരായ ടെസ്റ്റ് പരമ്പര ദക്ഷിണാഫ്രിക്ക സ്വന്തമാക്കി. രണ്ടാം ടെസ്റ്റില്‍ 282 റണ്‍സിന്റെ കൂറ്റന്‍ വിജയം പിടിച്ചാണ് ദക്ഷിണാഫ്രിക്ക മൂന്നു ടെസ്റ്റുകളുടെ പരമ്പര 2-0ത്തിനു നേടിയത്. 507 റണ്‍സ് വിജയ ലക്ഷ്യം പിന്തുടര്‍ന്ന ലങ്കയുടെ രണ്ടാം ഇന്നിങ്‌സ് 224 റണ്‍സില്‍ അവസാനിച്ചു.
ദക്ഷിണാഫ്രിക്ക ഒന്നാം ഇന്നിങ്‌സ് 392, രണ്ടാം ഇന്നിങ്‌സ് ഏഴിനു 224 ഡിക്ല. ശ്രീലങ്ക ഒന്നാം ഇന്നിങ്‌സ് 110, രണ്ടാം ഇന്നിങ്‌സ് 224.
നാലു വിക്കറ്റ് നഷ്ടത്തില്‍ 130 റണ്‍സെന്ന നിലയില്‍ നാലാം ദിനം തുടങ്ങിയ ലങ്കയ്ക്ക് അവസാന ദിനത്തില്‍ 94 റണ്‍സ് മാത്രമാണു സ്വന്തമാക്കാനായത്. 49 റണ്‍സ് നേടിയ ആഞ്ജലോ മാത്യൂസ് മാത്രമാണു അല്‍പ്പം പിടിച്ചു നിന്നത്. ആറു വിക്കറ്റ് വീഴ്ത്തിയ കംഗീസോ റബാഡയാണ് രണ്ടാമിന്നിങ്‌സിലും ലങ്കയെ തകര്‍ത്തത്. വെര്‍നോണ്‍ ഫിലാന്‍ഡര്‍ മൂന്നു വിക്കറ്റ് വീഴ്ത്തി. ആദ്യ ഇന്നിങ്‌സില്‍ നാലു വിക്കറ്റുകള്‍ വീഴ്ത്തി രണ്ടു ഇന്നിങ്‌സുകളിലായി 10 വിക്കറ്റുകള്‍ കൊയ്ത റബാഡ കളിയിലെ താരമായി.