കുമളി: തേക്കടിയില്‍ പ്രവേശന ടിക്കറ്റെടുക്കാന്‍ പുതിയ കൗണ്ടര്‍ വനം വകുപ്പ് തുറന്നു. കുമളി ഹോളിഡേ ഹോമിനു സമീപം ഗാന്ധി പാര്‍ക്കിലാണ് പുതിയ കൗണ്ടര്‍ തുറന്നത്. നിലവിലുള്ള തേക്കടി ചെക് പോസ്റ്റിലെ കൗണ്ടറിനു പുറമേയാണ് പുതിയ കൗണ്ടര്‍ സ്ഥാപിച്ചത്. വിനോദ സഞ്ചാര സീസണില്‍ പ്രവേശന ടിക്കറ്റെടുക്കാന്‍ ചെക്കു പോസ്റ്റില്‍ വന്‍ തിരക്കാണ് അനുഭവപ്പെടുന്നത്. തേക്കടി റോഡില്‍ ഗതാഗത സ്തംഭനത്തിനൊപ്പം സംഘര്‍ഷങ്ങള്‍ക്കും വന്‍ തിരക്ക് കാരണമാകുന്നു. ഈ സാഹചര്യത്തിലാണ് ടൗണില്‍ പുതിയ നാല് കൗണ്ടറുകള്‍ കൂടി തുറക്കാന്‍ വനം വകുപ്പ് തീരുമാനിച്ചത്. ഇതില്‍ ആദ്യത്തേതാണ് ഗാന്ധി പാര്‍ക്കില്‍ തുറന്നത്. കുമളി ഗ്രാമപഞ്ചായത്ത് പ്രസിഡണ്ട് ആന്‍സി ജയിംസ് പുതിയ കൗണ്ടറിന്റെ ഉദ്ഘാടനം നിര്‍വഹിച്ചു.