കൊടുങ്ങല്ലൂര്‍: നിയുക്ത മന്ത്രിക്ക് പൊതുനിരത്തില്‍ വെച്ച് മുന്‍ എം.എല്‍.എയുടെ വക സ്‌നേഹാശംസ. പുല്ലൂറ്റ് നാരയണമംഗലത്ത് വെച്ചാണ് നിയുക്തമന്ത്രി വി.എസ് സുനില്‍കുമാറിനെ ഷാളണിയിച്ചും ആലിംഗനം ചെയ്തും മുന്‍ എം.എല്‍.എ ടി.എന്‍ പ്രതാപന്‍ ആശംസകള്‍ നേര്‍ന്നത്.
വി.എസ് സുനില്‍കുമാര്‍ മുന്‍ മന്ത്രി വി.കെ രാജന്റെ വീട്ടിലെത്തി മടങ്ങുമ്പോഴായിരുന്നു അപ്രതീക്ഷിതമായ കണ്ട് മുട്ടല്‍.
റോഡില്‍ കാത്തു നില്‍ക്കുകയായിരുന്ന ടി.എന്‍ പ്രതാപനെ കണ്ടയുടനെ വി.എസ് സുനില്‍കുമാര്‍ കാര്‍ നിറുത്തി ഇറങ്ങി.
തുടര്‍ന്ന് ടി.എന്‍ പ്രതാപന്‍ നിയുക്ത എം.എല്‍.എയെ ഖദര്‍ ഷാള്‍ അണിയിക്കുകയും ആശ്ലേഷിക്കുകയും ചെയ്തു. എതാനും സമയം സൗഹൃദം പങ്കിട്ട ശേഷം ഇരുവരും വഴിപിരിഞ്ഞു.