ചെന്നൈ: അന്തരിച്ച തമിഴ്‌നാട് മുന്‍ മുഖ്യമന്ത്രി ജയലളിതയുടെ മണ്ഡലത്തില്‍ ശശികല നടരാജനെതിരെ ജനങ്ങളുടെ പ്രതിഷേധം.

ജയലളിതയുടെ തോഴിയായിരുന്ന ശശികല പാര്‍ട്ടി ചുമതല ഏറ്റെടുത്തതോടെ അമ്മയുടെ മണ്ഡലമായ ആര്‍കെ നഗറില്‍ മത്സരിക്കുമെന്ന അഭ്യൂഹങ്ങള്‍ പടര്‍ന്നതോടെയാണ് പ്രതിഷേധവുമായി ജനങ്ങളെത്തിയത്. ഡിസംബര്‍ അഞ്ചിന് അന്തരിച്ച ജയലളിതയ്ക്ക് 30ാം ദിവസമായ ഇന്നലെ ആര്‍കെ നഗറില്‍ ആദരാഞ്ജലി അര്‍പ്പിച്ച് നടത്തിയ മൗനജാഥയിലാണ് ആളുകളുടെ പ്രതിഷേധം.

റാലിക്കിടയില്‍ എംഎല്‍എ വെട്രിവേല്‍ ശശികല അമ്മയുടെ മണ്ഡലത്തില്‍ മത്സരിക്കണമെന്നാവശ്യപ്പെട്ടതോടെയാണ് പ്രതിഷേധമുയര്‍ന്നത്.

ഞങ്ങള്‍ അമ്മയ്ക്ക് വേണ്ടിയാണ് ഇവിടെ വന്നത് അവരോട് പറഞ്ഞേക്കൂ, ഞങ്ങള്‍ അവര്‍ക്ക് വോട്ട് ചെയ്യാനാണ് വന്നതെന്ന് ഒരിക്കലും കരുതരുതെന്ന് പ്രദേശവാസിയായ പി.കുപ്പു പറഞ്ഞു.

77 ദിവസം അമ്മ ആശുപത്രിയില്‍ കഴിഞ്ഞു. അവര്‍ അമ്മയെ ആരെയെങ്കിലും കാണിച്ചോ? ഒരു വനിതയുടെ ചോദ്യം ഇങ്ങനെ.

മറ്റൊരു അണ്ണാഡിഎംകെ അനുയായി രാജലക്ഷ്മി പറഞ്ഞത് ദീപ ജയകുമാറാണ് ജയലളിതയുടെ യഥാര്‍ത്ഥ പിന്‍ഗാമിയെന്നാണ്.

ഇതെല്ലാം പ്രതിപക്ഷമായ ഡിഎംകെ കെട്ടിച്ചമച്ചതാണെന്ന് വെട്രിവേല്‍ ആരോപിച്ചു.

ഇതിനിടയില്‍ നൂറുകണക്കിന് എഐഎഡിഎംകെ പ്രവര്‍ത്തകര്‍ ദീപയുടെ വസതിയിലെത്തി പാര്‍ട്ടിയെ നയിക്കാന്‍ രംഗത്ത് വരണമെന്ന് ആവശ്യപ്പെട്ടു.