മഞ്ചേരി: കഴിഞ്ഞ ദിവസം മഞ്ചേരി മെഡിക്കല്‍ കോളജിലെ ടോയ്‌ലറ്റില്‍ പ്രസവിക്കാനിടയായ സംഭവത്തില്‍ ശരിയായ അന്വേഷണം നടത്തണമെന്നാവശ്യപ്പെട്ടു യുവതി മെഡിക്കല്‍ കോളജ് പ്രിന്‍സിപ്പല്‍ക്കു വീണ്ടും പരാതിനല്‍കി. അന്വേഷണ സമിതി തയാറാക്കിയ റിപ്പോര്‍ട്ട് സംഭവത്തിനു ഉത്തരവാദികളായവരെ സംരക്ഷിക്കുന്നതാണെന്നു കാണിച്ച് ഇന്നലെയാണ് വീണ്ടും പരാതി നല്‍കിയത്.
അന്വേഷണ സമിതി മൊഴിയെടുത്തിരുന്നങ്കിലും സര്‍ക്കാരിനു സമര്‍പ്പിച്ചത് അത്തരത്തിലുള്ള മൊഴിയല്ലെന്നു പരാതിയില്‍ പറയുന്നു. അഡ്മിറ്റ് ചെയ്യപ്പെട്ട അന്നുതന്നെ നേരിയ വേദന അനുഭവപ്പെട്ടിരുന്നു. കുഞ്ഞിന്റെ അനക്കം നോക്കാന്‍ നഴ്‌സിങ് റൂമിലേക്കു വിളിപ്പിച്ചെന്നും അനക്കം കിട്ടാത്തതിനാല്‍ തന്നോട് നിര്‍ബന്ധിച്ചു മൂത്രമൊഴിക്കാന്‍ പറഞ്ഞയക്കുകയായിരുന്നുവെന്നും പരാതിയില്‍ പറയുന്നു. സംഭവം നടക്കുമ്പോള്‍ രണ്ടു നഴ്‌സുമാര്‍ മാത്രമേ ഉണ്ടായിരുന്നുള്ളൂ. വാര്‍ഡില്‍ ഡ്യൂട്ടി ഡോക്ടര്‍ ഉണ്ടായിരുന്നില്ല. കുറ്റക്കാരെ കണ്ടെത്തി മാതൃകപരമായി ശിക്ഷിക്കണമെന്നും യുവതി പരാതിയില്‍ ആവശ്യപ്പെട്ടു.
അതേസമയം, സംഭവത്തില്‍ മെഡിക്കല്‍ കോളജ് ജീവനക്കാരുടെ ഭാഗത്തു വീഴ്ച സംഭവിച്ചിട്ടില്ലെന്നായിരുന്നു അന്വേഷണസമിതി റിപ്പോര്‍ട്ട് സമര്‍പ്പിച്ചിരുന്നത്. ആശുപത്രി സുപ്രണ്ട് ഡോ. നന്ദകുമാര്‍, ഗൈനക്കോളജി വിഭാഗം മേധാവി ഡോ. അംബുജം എന്നിവരടങ്ങിയ സമിതിയാണ് അന്വേഷണം നടത്തിയിരുന്നത്.