എടവണ്ണപ്പാറ: വാഴക്കാടിന്റെ സാംസ്‌കാരിക, രാഷ്ട്രീയ ഭൂമിയില്‍നിന്നു വാനോളമുയര്‍ന്ന നാട്ടുകാരുടെ വായിച്ചിയായ ഹുസൈന്‍ സാഹിബ് ഇനി ഓര്‍മ. ഏഴര പതിറ്റാണ്ടിനിടയില്‍ എത്രയോ നന്മകള്‍ ബാക്കിവച്ചാണ് മുഹമ്മദ് ഹുസൈന്‍ സാഹിബ് വിടപറഞ്ഞത്.
മലബാറിലെ പ്രശസ്തമായ വാഴക്കാട്ടെ കൊയപ്പത്തൊടി കുടുംബത്തില്‍ ജനിച്ച ഹുസൈന്‍ സാഹിബിന്റെ ജീവിതം വേദനിക്കുന്നവരോടു കൂടെയായിരുന്നു. കേരളത്തില്‍ യതീംഖാനകള്‍ വിരളമായിരുന്ന 1970കളിലാണ് തന്റെ സഹോദരിയുടെ സ്ഥലം വിലയ്ക്കുവാങ്ങി എളമരം യതീംഖാന സ്ഥാപിക്കുന്നത്. യതീം കുട്ടികളുടെ പ്രയാസങ്ങള്‍ ഏറ്റെടുത്തു തന്റെ സമ്പത്തും ജീവിതവും അവര്‍ക്കുവേണ്ടി മാറ്റിവച്ചു അദ്ദേഹം. കഴിഞ്ഞ 47 വര്‍ഷങ്ങള്‍ക്കിടയില്‍ ആയിരക്കണക്കിനു വിദ്യാര്‍ഥികളാണ് ഇവിടെ പഠനം നടത്തിയത്. ഇപ്പോഴും 120 കുട്ടികള്‍ പഠിക്കുന്നുണ്ട്. സ്ഥാപനത്തിന്റെ സെക്രട്ടറി എന്നതിലുപരി ഇവര്‍ക്കൊക്കെ പിതാവുമായിരുന്നു ഹുസൈന്‍ സാഹിബ്.
നിരവധി വിദ്യാഭ്യാസ സ്ഥാപനങ്ങളും അദ്ദേഹത്തിന്റെ ശ്രമഫലമായി ഉണ്ടായിട്ടുണ്ട്. വാഴക്കാട് സി.എച്ച് ഹൈസ്‌കൂള്‍, പാലക്കുഴി എല്‍.പി സ്‌കൂള്‍, ഉഗ്രപുരം എല്‍.പി സ്‌കൂള്‍, എ.യു.പി.എസ് തൃപ്പനച്ചി, ബി.ടി.എം.ഒ.യു.പി.എസ് എളമരം എന്നീ വിദ്യാഭ്യാസ സ്ഥാപനങ്ങളുടെ ശില്‍പിയും മാനേജരും അദ്ദേഹമായിരുന്നു. വാഴക്കാട് ദാറുല്‍ ഉലൂം അസോസിയേന്‍ വൈസ് പ്രസിഡന്റുമായിരുന്നു.
സമസ്തയുടെയും മുസ്‌ലിംലീഗിന്റെയും മുന്‍പത്തെയും ഇപ്പോഴത്തേയും നേതാക്കളുടെ ആത്മ സുഹൃത്തായിരുന്നു അദ്ദേഹം. പാണക്കാട് കുടുംബവുമായി നല്ല ബന്ധമായിരുന്നു. രാഷ്ട്രീയ രംഗത്തു മുസ്‌ലിംലീഗ് സംസ്ഥാന കൗണ്‍സിലര്‍ സ്ഥാനംവരെ വഹിച്ച അദ്ദേഹം അധികാരക്കസേരകളെ ഇഷ്ടംവച്ചില്ല.
പാണക്കാട് സയ്യിദ് ഹൈദരലി ശിഹാബ് തങ്ങള്‍, സ്വാദിഖലി ശിഹാബ് തങ്ങള്‍, മുനവ്വറലി ശിഹാബ് തങ്ങള്‍, സമസ്ത ജനറല്‍ സെക്രട്ടറി കെ. ആലിക്കുട്ടി മുസ്‌ലിയാര്‍, വൈസ് പ്രസിഡന്റ് എം.ടി അബ്ദുള്ള മുസ്‌ലിയാര്‍, പ്രതിപക്ഷ ഉപനേതാവ് പി.കെ കുഞ്ഞാലിക്കുട്ടി, കെ.പി.എ മജീദ്, ഹാജി കെ. മമ്മദ് ഫൈസി, കുട്ടിഹസന്‍ ദാരിമി തുടങ്ങിയ നേതാക്കള്‍ ജനാസ സന്ദര്‍ശിച്ചു. നിരവധി തവണയായി നടന്ന മയ്യിത്ത് നിസ്‌കാരത്തിന് പ്രമുഖര്‍ നേതൃത്വം നല്‍കി. ഇന്നലെ രാവിലെ 10.30ന് വാഴക്കാട് ദാറുല്‍ ഉലൂം ഖബര്‍സ്ഥാനില്‍ മറവ് ചെയ്തു.
അനുശോചന യോഗം മുനവ്വറലി ശിഹാബ് തങ്ങള്‍ ഉദ്‌ലാടനം ചെയ്തു. അബ്ദുല്‍ ഹമീദ് മാസ്റ്റര്‍ അധ്യക്ഷനായി. പി. ഉബൈദുള്ള എം.എല്‍.എ, പി.വി മുഹമ്മദ് അരീക്കോട്, പി.എ ജബ്ബാര്‍ ഹാജി, അബ്ദുല്‍ അലി മാസ്റ്റര്‍, പനക്കല്‍ കുഞ്ഞഹമ്മദ്, മുഹമ്മദ് അബ്ദുറഹിമാന്‍, ജൈസല്‍ എളമരം, ടി.പി അസീസ്, എം.കെ.സി മൊയ്തീന്‍, അബ്ദുറഹിമാന്‍ മാസ്റ്റര്‍, മുഹമ്മദ് കുട്ടി മാസ്റ്റര്‍, കെ.അലി, എം.കെ.സി നൗഷാദ് സംസാരിച്ചു.