ഇരിട്ടി: കര്‍ണാടകയില്‍ നിന്നു കേരളത്തിലേക്ക് രണ്ടു ബസുകളിലായി കടത്തുകയായിരുന്ന 500 ഗ്രാം കഞ്ചാവും 19 കുപ്പി കര്‍ണാടക മദ്യവും രണ്ടു കിലോ നിരോധിത പുകയില ഉല്‍പന്നങ്ങളും പിടികൂടി. കര്‍ണാടകത്തില്‍ നിന്നു ഇരിട്ടി ഭാഗത്തേക്ക് വരികയായിരുന്ന കെ.എസ്.ആര്‍.ടി.സി ബസില്‍ നിന്നാണ് 500ഗ്രാം കഞ്ചാവുമായി മടിക്കേരി സ്വദേശി ഉദേഷി(23)നെ കിളിയന്തറ എക്‌സൈസ് സംഘം പിടികൂടിയത്. ബാഗിനകത്ത് പൊതിഞ്ഞു സൂക്ഷിച്ചനിലയിലായിരുന്നു കഞ്ചാവ്. ജില്ലയിലെ ഇതരദേശ തൊഴിലാളികള്‍ക്കും ചില വിദ്യാര്‍ഥികള്‍ക്കും വില്‍പ്പന നടത്താനാണ് കൊണ്ടുപോകുന്നതെന്ന് ഇയാള്‍ മൊഴി നല്‍കി. പ്രതിയെ മട്ടന്നൂര്‍ കോടതി റിമാന്‍ഡ് ചെയ്തു.
ഇരിട്ടിയിലേക്ക് വീരാജ്‌പേട്ടയില്‍ നിന്നു വരികയായിരുന്ന സ്വകാര്യ ബസില്‍ നിന്നാണ് ആളില്ലാത്ത നിലയില്‍ കടത്തുകയായിരുന്ന 19 കുപ്പി കര്‍ണാടക മദ്യവും രണ്ടു കിലോ നിരോധിത പുകയില ഉത്പന്നങ്ങളും എക്‌സൈസ് പിടികൂടിയത്.