തൊടുപുഴ: ഇടുക്കി റവന്യു ജില്ലാ കലോത്സവത്തില്‍ എച്ച്.എസ്. വിഭാഗം ഒപ്പനയില്‍ കട്ടപ്പന ഓസാനം ഇംഗ്ലീഷ് മീഡിയം എച്ച്.എസ്. ഒന്നാം സ്ഥാനം നേടിയപ്പോള്‍ തകര്‍ന്നടിഞ്ഞത് വര്‍ഷങ്ങളായി കുമാരമംഗലം എം.കെ.എന്‍.എം.എച്ച്.എസും മുതലക്കോടം സെന്റ്. ജോര്‍ജ്ജ് എച്ച്.എസും കുത്തകയാക്കി വെച്ചിരുന്ന ഒന്നാം സ്ഥാനം. തങ്ങളുടെ വിജയത്തിന് ഇരട്ടി മധുരമാണെന്ന് ടീം ലീഡര്‍ സ്വാതി വിജയന്‍ പറഞ്ഞു.
ഒ.എം കരുവാരക്കുണ്ട് രചിച്ച മഹ്മൂദിന്‍ ആരംഭം എന്ന ഗാനം ശ്രുതി മധുരമായി ആലപിച്ച് ഒപ്പത്തിനൊപ്പം ചുവട് വെച്ച വിദ്യാര്‍ഥിനികള്‍ ഒന്നാം സ്ഥാനത്തെത്തുകയായിരുന്നു.
മണവാട്ടിയായി വേഷമിട്ട ഡയാന ബിജുവും നിര്‍ണ്ണായക വിജയത്തിന് വേണ്ടി അരങ്ങില്‍ നിറഞ്ഞു നിന്നു. കണ്ണൂര്‍ ബിജുകുമാറാണ് ഇവരെ പരിശീലിപ്പിച്ചത്.
സ്വാതി വിജയന്‍, ഐശ്വര്യ ബിനു, എയ്ഞ്ചല്‍ മേരി, അന്‍സു എബ്രഹാം, ഡിസോണ ബെന്നിച്ചന്‍, ബിയാമോള്‍ ക്ലിന്നിസ്, അന്നു മരിയ ഷാജി, മെറിന്‍ മേരി ജോസ്, പ്രീതി പ്രമോദ് എന്നിവരാണ് സംഘാംഗങ്ങള്‍. ഇതാദ്യമായാണ് ഒപ്പനയില്‍ കട്ടപ്പന ഓസാനം ഇംഗ്ലീഷ് മീഡിയം എച്ച്.എസ്. ഒന്നാമതെത്തുന്നത്.
ഹയല്‍ സെകന്‍ഡറി ഒപ്പനയില്‍ കുമാരമംഗലം എം.കെ.എന്‍.എം.എച്ച്.എസ്.എസ് കിരീടം നിലനിര്‍ത്തി. ഡില്‍ന ദിലീപാണ് ടീമിനെ നയിച്ചത്.