ന്യൂഡല്‍ഹി: 2ജി ലൈസന്‍സ് മറ്റു കമ്പനികള്‍ക്കു കൈമാറരുതെന്ന് എയര്‍സെല്ലിനും മലേഷ്യന്‍ കമ്പനിയായ മാക്‌സിസിനും കോടതിയുടെ കടുത്ത നിര്‍ദേശം.
 ചീഫ് ജസ്റ്റിസ് ജെ.എസ് ഖെഹാര്‍ അധ്യക്ഷനായ സുപ്രിം കോടതി ബെഞ്ചാണ് ഇരുകമ്പനികളെയും ലൈസന്‍സ് കൈമാറുന്നതു വിലക്കിയത്. എയര്‍സെല്ലിനു ലഭിച്ച ലൈസന്‍സാണു നിലവില്‍ മാക്‌സിസ് ഉടമപ്പെടുത്തിയിരിക്കുന്നത്.
ജസ്റ്റിസുമാരായ എന്‍.വി രമണ, ഡി.വൈ ചന്ദ്രചൂഡ് അടങ്ങിയ ബെഞ്ച് മാക്‌സിസ് തലവന്‍ ടി. ആനന്ദ കൃഷ്ണ അടിയന്തരമായി കോടതിക്കു മുന്‍പാകെ ഹാജരാകണമെന്നു കര്‍ശന നിര്‍ദേശവും നല്‍കിയിട്ടുണ്ട്.
ഈ മാസം 27ന് കോടതിയില്‍ ഹാജരായില്ലെങ്കില്‍ എയര്‍സെല്ലിന് അനുവദിച്ച ലൈസന്‍സ് റദ്ദാക്കുമെന്നും കോടതി മുന്നറിയിപ്പു നല്‍കിയിട്ടുണ്ട്.