തൃശൂര്‍:  ദക്ഷിണാമൂര്‍ത്തിയുടെ സ്മരണയ്ക്കായി പെരിങ്ങോട്ടുകര ദേവസ്ഥാനം നല്‍കിവരുന്ന ദക്ഷിണാമൂര്‍ത്തി നാദപുരസ്‌കാരം ലതാ മങ്കേഷ്‌ക്കറിന് നല്‍കുമെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു.
 ഒരു ലക്ഷം രൂപയും പൊന്നാടയും ശില്‍പവും അടങ്ങുന്ന പുരസ്‌കാരം 13 ന് അഞ്ചാമത് ദക്ഷിണാമൂര്‍ത്തി സംഗീതോത്സവത്തിന്റെ ഉദ്ഘാടന വേദിയില്‍ വച്ച്  സമ്മാനിക്കും.  
സംഗീത സംവിധായകന്‍ ശ്രീകുമാരന്‍ തമ്പി ദക്ഷിണാമൂര്‍ത്തി അനുസ്മരണ പ്രഭാഷണം നടത്തും. സംഗീതജ്ഞന്‍ കെ.ജി ജയനെ ദേവസ്ഥാനം ആസ്ഥാന സംഗീത വിദ്വാന്‍ പദവി നല്‍കി ആദരിക്കും.
22 വരെ നീണ്ടുനില്‍ക്കുന്ന സംഗീതോത്സവത്തില്‍ ഉമ്പായി, വൈക്കം വിജയലക്ഷ്മി, സുചിത്ര ബാലസുബ്രഹ്മണ്യം എന്നിവരുടെ സംഗീത സദസുമുണ്ടാകും.
വാര്‍ത്താസമ്മേളനത്തില്‍ സംഘാടകരായ ടി.എസ് രാധാകൃഷ്ണന്‍, പൂര്‍ണത്രയി ജയപ്രകാശ്, കെ.ജി ഹരിദാസ്, അഡ്വ. കെ പ്രവീണ്‍ പങ്കെടുത്തു.