പാലക്കാട്: സി.പി.എം- ബി.ജെ.പി സംഘര്‍ഷത്തിനിടെയുണ്ടായ തീവെപ്പില്‍ പൊള്ളലേറ്റ്  ചികിത്സയിലായിരുന്ന ബി.ജെ.പി പ്രവര്‍ത്തകന്‍ മരിച്ചു.  ചടയന്‍കലായില്‍ ശ്രീവത്സത്തില്‍ രാധാകൃഷ്ണന്‍(47) ആണ്   ഇന്നലെ വൈകിട്ട് മൂന്നോടെ തൃശൂരിലെ സ്വകാര്യാശുപത്രിയില്‍ വച്ച്  മരിച്ചത്.  രാധാകൃഷ്ണന്റെ വീടിനു നേരെ ഡിസംബര്‍ 28ന് പുലര്‍ച്ചെയാണ് ആക്രമണം ഉണ്ടായത്. ബൈക്കില്‍ വന്ന നാലംഗ അക്രമിസംഘം രാധാകൃഷ്ണന്റെ വീടിന് പുറത്തുണ്ടായിരുന്ന ബൈക്കുകള്‍ക്ക് തീ വയ്ക്കുകയായിരുന്നു. ബൈക്കില്‍ നിന്നും തീ ജനലിലൂടെ വീടിനകത്തേക്ക് പടര്‍ന്ന് അടുക്കളയിലുണ്ടായിരുന്ന ഗ്യാസ് സിലിണ്ടര്‍ പൊട്ടിത്തെറിക്കുകയായിരുന്നു.  മൂന്നുബൈക്കും ഒരു സൈക്കിളുമാണ് കത്തിനശിച്ചത്. രാധാകൃഷ്ണനു പുറമേ സഹോദരന്‍  കണ്ണന്‍, ഭാര്യ വിമല, മറ്റൊരു സഹോദരന്‍ ശെല്‍വന്റെ മകന്‍ ശരത്ത് എന്നിവര്‍ക്കും പൊള്ളലേററിരുന്നു. സരിതയാണ് രാധാകൃഷ്ണന്റെ ഭാര്യ.കഞ്ചിക്കോട് വി.എച്ച്.എസ.്എസ.് പ്ലസ്ടു വിദ്യാര്‍ഥി അരുണ്‍,പാലക്കാട് മോയന്‍ ഗേള്‍സ് ഹൈസ്‌കൂളിലെ എട്ടാംക്ലാസ് വിദ്യാര്‍ഥിനി  അശ്വതി മക്കളാണ്.