തളിപ്പറമ്പ്: കോള്‍മൊട്ടയില്‍ സി.പി.ഐ ഓഫിസ് അടിച്ചുതകര്‍ത്ത സംഭവത്തില്‍ പ്രതിഷേധം വ്യാപകം. സി.പി.ഐയുടെ ആന്തൂര്‍ ബ്രാഞ്ച് കമ്മിറ്റി ഓഫിസ് പ്രവര്‍ത്തിക്കുന്ന കെ.വി മൂസാന്‍കുട്ടി മാസ്റ്റര്‍ സ്മാരക മന്ദിരത്തിനു നേര്‍ക്കാണ് വെള്ളിയാഴ്ച്ച രാത്രിയില്‍ അക്രമം നടന്നത്. ഓഫിസ് കെട്ടിടത്തിന്റെ ജനല്‍ ചില്ലുകള്‍ അടിച്ചു തകര്‍ത്തു. മൂസാന്‍കുട്ടി മാസ്റ്ററുടെ തറവാട് വീട്ടിനു മുന്നില്‍ പറശിനിക്കടവ് റോഡില്‍ ബന്ധുക്കള്‍ വിട്ടുനല്‍കിയ സ്ഥലത്ത് നിര്‍മിച്ച സ്മാരക മന്ദിരം 2007ല്‍ സി.പി.ഐ സംസ്ഥാന സെക്രട്ടറിയായിരുന്ന സി.കെ ചന്ദ്രപ്പനാണ് ഉദ്ഘാടനം ചെയ്തത്. അക്രമ വിവരമറിഞ്ഞ് സി.പി.എം തളിപ്പറമ്പ് ഏരിയാ സെക്രട്ടറി പി മുകുന്ദന്‍, സി.പി .ഐ തളിപ്പറമ്പ് മണ്ഡലം സെക്രട്ടറി വി.വി കണ്ണന്‍ ജില്ലാ എക്‌സിക്യുട്ടീവ് അംഗം വേലിക്കാത്ത് രാഘവന്‍, സി.പി.ഐ ദേശീയ എക്‌സിക്യൂട്ടീവ് അംഗം പന്ന്യന്‍ രവീന്ദ്രന്‍ എന്നിവര്‍ സ്ഥലത്തെത്തി.
കമ്മ്യൂണിസ്റ്റുകാര്‍ക്ക് വ്യക്തമായ സ്വാധീനമുള്ള സ്ഥലമാണിത്. ആരാണിത് ചെയ്തതെന്നതില്‍ ദുരൂഹതകളുണ്ട്. പ്രദേശത്ത് കമ്മ്യൂണിസ്റ്റ് പാര്‍ട്ടിയുടെ പ്രവര്‍ത്തനങ്ങള്‍ നടത്തുന്നത് ഇഷ്ടപ്പെടാത്ത സാമൂഹ്യദ്രോഹികളാണ് ഇതു ചെയ്തതെന്ന് പറഞ്ഞാല്‍ അതു ചിന്തിക്കേണ്ട വിഷയമാണെന്നു പന്ന്യന്‍ രവീന്ദ്രന്‍ പറഞ്ഞു. സംഭവത്തില്‍ പ്രതിഷേധിച്ച് സി.പി.ഐയുടെ നേതൃത്വത്തില്‍ ഇന്നലെ വൈകുന്നേരം കോള്‍മൊട്ടയില്‍ പ്രതിഷേധ പ്രകടനവും പൊതുയോഗവും സംഘടിപ്പിച്ചു. നേതാക്കളായ സി.എന്‍ ചന്ദ്രന്‍, അഡ്വ. പി സന്തോഷ്, വി.വി കണ്ണന്‍, എന്‍.പി ലക്ഷ്മണന്‍, മുജീബ് റഹ്മാന്‍ സംസാരിച്ചു.