കൊണ്ടോട്ടി:സംസ്ഥാന ഹജ്ജ് കമ്മിറ്റിയുടെ ഔദ്യോഗിക വെബ്‌സൈറ്റ് ഹാക്ക് ചെയ്തു. കേരള ഹജ്ജ് കമ്മിറ്റി എന്ന പേരിലുള്ള വെബ്‌സൈറ്റാണ് ഇന്നലെ പാക്കിസ്ഥാന്‍ സിന്ദാബാദ് എന്നു ചേര്‍ത്ത് രാത്രിയോടെ കണ്ടെത്തിയത്. തീര്‍ത്ഥാടനത്തിനുള്ള അപേക്ഷകള്‍ സ്വീകരിച്ചു വരുന്ന സമയത്താണിത്.
ഓണ്‍ലൈന്‍ അപേക്ഷകളും സ്വീകരിച്ചു വരുന്നുണ്ട്. ഹജ്ജ് കമ്മിറ്റിയുടെ നിര്‍ദേശങ്ങളടക്കമുള്ള വെബ്‌സൈറ്റ് ഹാക്ക് ചെയ്യപ്പെട്ടത് ഏറെ ഗൗരവത്തോടെയാണ് കാണുന്നത്.
ഇന്നലെ രാത്രി തീര്‍ത്ഥാടകര്‍ അപേക്ഷ സംബന്ധിച്ച വിവരങ്ങള്‍ തേടി വെബ്‌സൈറ്റ് സന്ദര്‍ശിച്ചപ്പോഴാണ് ഹാക്ക് ചെയ്യപ്പെട്ടതായി കണ്ടെത്തിയത്. വെബ്‌സൈറ്റ് തുറന്നാല്‍  സൈറ്റ് ഹാക്ക് ചെയ്യപ്പെട്ടുവെന്ന് കാണിച്ച് മുഖം വ്യക്തമല്ലാത്ത യുവാവിന്റെ ചിത്രത്തോടെയാണ് പ്രത്യക്ഷപ്പെടുന്നത്. വെബ്‌സൈറ്റിന്റെ സെക്യൂറിറ്റി കോഡ് അത്ര ശരിയല്ലെന്നും, ഞങ്ങളെ വെറുക്കരുത്, സെക്യൂരിറ്റി കോഡില്‍ അവബോധമുണ്ടാവണമെന്നും മുന്നറിയിപ്പായി കുറിച്ചിട്ടുണ്ട്.   നിലവിലുള്ള ഡാറ്റകളൊന്നും ഞങ്ങള്‍ നശിപ്പിച്ചിട്ടില്ലെന്നും രേഖപ്പെടുത്തിയിരിക്കുന്നു.