റിയാദ്: ശസ്ത്രക്രിയക്കായി സയാമീസ് ഇരട്ടകളായ മിന്‍ഹയും മെയ്യും റിയാദിലെത്തി. ഈജിപ്തില്‍ തലയോട്ടി ഒട്ടിപ്പിടിച്ച് പിറന്നുവീണ ഇവര്‍ കുടുംബത്തോടൊപ്പമാണ് റിയാദിലെത്തിയത്. റിയാദിലെ കിങ് അബ്ദുല്‍ അസീസ് വിമാനത്താവളത്തിലെത്തിയ ഇവരെ സഊദി ആരോഗ്യ മന്ത്രാലയത്തിലെ ഉന്നത ഉദ്യോഗസ്ഥര്‍ സ്വീകരിച്ചു. സല്‍മാന്‍ രാജാവിന്റെ നിര്‍ദേശപ്രകാരം സൗജന്യമായാണ് ഇവര്‍ക്ക് ശസ്ത്രക്രിയ നടത്തുന്നത്. നാഷനല്‍ ഗാര്‍ഡ് ആസ്ഥാനത്തെ കിങ് അബ്ദുല്‍ അസീസ് മെഡിക്കല്‍ സിറ്റിയിലാണ് വൈദ്യപരിശോധനയും ശസ്ത്രക്രിയയും നടക്കുക.
കിങ് സല്‍മാന്‍ ചാരിറ്റി സെന്റര്‍ മേധാവിയും മുന്‍ ആരോഗ്യ മന്ത്രിയും നിരവധി സയാമീസുകളെ വിജയകരമായി വേര്‍പെടുത്തുകയും ചെയ്ത ഡോ. അബ്ദുല്ല അബ്ദുല്‍ അസീസ് റബീഅയുടെ നേതൃത്വത്തില്‍ ശസ്ത്രക്രിയ നടക്കും. മാസങ്ങള്‍ നീളുന്ന നാലു ഘട്ടങ്ങളായാണ് ഇത് നടക്കുക.
തലയുടെ പിന്‍ഭാഗം പരസ്പരം ഒട്ടിപ്പിടിച്ച നിലയിലാണ് കുട്ടികള്‍. പരിശോധനയില്‍ തലച്ചോറിലെ ചില നാഡികള്‍ കെട്ടുപിണഞ്ഞതായും കണ്ടെത്തിയിട്ടുണ്ട്. ശസ്ത്രക്രിയക്ക് നേതൃത്വം നല്‍കുന്ന ഡോ. റബീഅ 31 സയാമീസുകളെ വിജയകരമായി വേര്‍പെടുത്തിയ റെക്കോര്‍ഡിന് ഉടമയാണ്. 1992ല്‍ സുഡാനി സയാമീസുകളെ വേര്‍പെടുത്തിയാണ് തുടക്കം. ഏറ്റവും ഒടുവിലത്തെ ശസ്ത്രക്രിയ പാക് ദമ്പതികളുടെ മക്കളെ വേര്‍പെടുത്തിയതാണ്.