ന്യൂഡല്‍ഹി: ഛത്തീസ്ഗഢിലെ ഗോത്ര വര്‍ഗ മേഖലയിലെ 16ഓളം സ്ത്രീകള്‍ സംസ്ഥാന പൊലിസിന്റെ ലൈംകിഗ പീഡനത്തിനും ശാരീരിക അതിക്രമങ്ങള്‍ക്കും ഇരയായിട്ടുണ്ടെന്ന് ദേശീയ മനുഷ്യാവകാശ കമ്മിഷന്‍ റിപ്പോര്‍ട്ട്. ഇക്കാര്യത്തില്‍ സര്‍ക്കാര്‍ എന്തുകൊണ്ട് നടപടിയെടുക്കുന്നില്ലെന്നും അതിക്രമങ്ങള്‍ക്ക് ഇരയായ സ്ത്രീകള്‍ക്ക് നഷ്ടപരിഹാരം നല്‍കണമെന്നും കമ്മീഷന്‍ ഉത്തരവിട്ടു.

പൊലിസ് നടപടികളുടെ ഉത്തരവാദിത്വം സംസ്ഥാന സര്‍ക്കാരിനാണെന്നും ഇക്കാര്യത്തില്‍ വിശദീകരണം നല്‍കണമെന്നാവശ്യപ്പെട്ടും സര്‍ക്കാരിന് കമ്മിഷന് ഷോക്കോസ് നോട്ടിസ് നല്‍കിയിട്ടുണ്ട്.

ഇടക്കാല നഷ്ടപരിഹാരമായി 37 ലക്ഷം രൂപ നല്‍കണമെന്നും കമ്മിഷന്‍ ആവശ്യപ്പെട്ടു. 2015-16 കാലയളവില്‍ ബീജാപൂര്‍ ജില്ലയിലെ ബസ്താര്‍ മേഖലയില്‍ അഞ്ച് ഗ്രാമങ്ങളിലെ സ്ത്രീകള്‍ക്കാണ് ദുരനുഭവമുണ്ടായത്. ഇവിടെയെത്തിയ സുരക്ഷാ ജീവനക്കാര്‍ 16ഓളം സ്ത്രീകളെ ക്രൂരമായ ബലാല്‍സംഘത്തിനും ശാരീരികാതിക്രമത്തിനും ഇരയാക്കുകയായിരുന്നു.