കോങ്ങാട് (പാലക്കാട്) : തമിഴ്‌നാട്ടില്‍ നിന്നും മലപ്പുറത്തേക്കു വരികയായിരുന്ന മലയാളികളുടെ വാഹനം തടഞ്ഞുനിര്‍ത്തി പൊലിസ് വേഷത്തിലെത്തിയ സംഘം പതിനഞ്ചുലക്ഷം രൂപ തട്ടിയെടുക്കുകയും യാത്രക്കാരെ തട്ടിക്കൊണ്ടുപോകുകയും ചെയ്തതായി പരാതി. യാത്രക്കാരെ പിന്നീട് കോങ്ങാടിനടുത്ത് ഇറക്കിവിട്ട് സംഘം കടന്നുകളഞ്ഞതായും ഇവര്‍ പറഞ്ഞു.
ഇന്നലെ രാവിലെ ആറരയോടെയാണ് ഇന്നോവ കാറില്‍ മലപ്പുറത്തേക്ക് വരികയായിരുന്ന സംഘത്തിന്റെ പണം അപഹരിച്ചതായി പറയുന്നത്.
പൊലിസ് വേഷത്തില്‍ വന്നവരുടെ വാഹനത്തില്‍ പൊലിസ് എന്നെഴുതിയ സ്റ്റിക്കറുണ്ടായിരുന്നുവെന്നും തങ്ങളെ വാഹനത്തില്‍ കയറ്റിയത് കൈയാമം വച്ചാണെന്നും പണം നഷ്ടപ്പെട്ട മലപ്പുറം മാട്ടുമ്മല്‍ ക്ലാരി കുഞ്ഞിമൊയ്തീന്റെ മകന്‍ ഇസ്മാഈല്‍ കോങ്ങാട് പൊലിസിനോട് പറഞ്ഞു. എന്നാല്‍, സംഭവത്തെക്കുറിച്ച് വിശദമായ അന്വേഷണം ആവശ്യമാണെന്നും വിശദീകരണത്തില്‍ പൊരുത്തക്കേടുകള്‍ ഉണ്ടെന്നും പൊലിസ് പറയുന്നു. ഇസ്മാഈലിന്റെ പരാതിയില്‍ കേസ് രജിസ്റ്റര്‍ ചെയ്തിട്ടുണ്ട്.