കൊണ്ടോട്ടി: മോട്ടോര്‍ പമ്പിനുള്ളില്‍ ഒളിപ്പിച്ച് കടത്തിയ 3.36 കിലോ സ്വര്‍ണവുമായി യാത്രക്കാരനെ കരിപ്പൂര്‍ വിമാനത്താവളത്തില്‍ കസ്റ്റംസ് പ്രിവന്റീവ് വിഭാഗം പിടികൂടി. അബൂദബിയില്‍ നിന്ന് ഇന്നലെ പുലര്‍ച്ചെ ഇത്തിഹാദ് വിമാനത്തില്‍ കരിപ്പൂരിലെത്തിയ കോഴിക്കോട് അത്തോളി സ്വദേശി റമീസ് അബ്ദുള്‍ റസാഖ്(28)എന്ന യാത്രക്കാരനില്‍ നിന്നാണ് സ്വര്‍ണം കണ്ടെത്തിയത്.
രഹസ്യ വിവരം ലഭിച്ചതിനെ തുടര്‍ന്ന് കോഴിക്കോട് നിന്നെത്തിയ കസ്റ്റംസ് പ്രവന്റീവ് വിഭാഗം ഇയാളെ പിടികൂടി ചോദ്യം ചെയ്തപ്പോഴാണ് സ്വര്‍ണക്കടത്ത് കണ്ടെത്തിയത്. മോട്ടോര്‍ പമ്പിന്റെ അകത്തായിരുന്നു സ്വര്‍ണം ഉണ്ടായിരുന്നത്. ഇതിന്റെ വൈന്റിങ് അഴിച്ചു പരിശോധിക്കേണ്ടി വന്നു. സാധാരണ പരിശോധനയില്‍ കണ്ടെത്താന്‍ കഴിയാത്ത വിധമാണ് സ്വര്‍ണം ഒളിപ്പിച്ചിരുന്നത്.പിടികൂടിയ സ്വര്‍ണത്തിന് 98 ലക്ഷം രൂപ വിലവരും. സ്വര്‍ണക്കടത്ത് കാരിയറാണെന്ന് സംശയിക്കുന്ന ഇയാളെ ചോദ്യം ചെയ്തു വരികയാണ്.